Tíu pêi cheăng chêh pro mơéa tơdjuôm bêng Tân Lập kong pơlê Dak Lak hiăng châ hbrâ rơnáu hên kơmăi kơmok ki rơkê plĕng, mê ki xiâm má môi cho péa toăng kơmăi tĭnh cài đặt xứng dụng tuăn ngoâ rơkê (AI), gum kuăn pơlê tăng ‘nâi, nâp hô sơ ƀă séa ngăn tơdroăng ki tơdah xo, mơdrếo mơéa ing troăng hyôh internet. Ngoh Lê Văn Toàn lăm pro mơéa khai sinh ăm dêi kuăn ăm ‘nâi, ngoh châ mâu ngế cheăng akố hnê ứng dụng kong ngê̆ AI gá tơ’lêi khât.

“Mâu đoàn viên droh rơtăm gum á chêh mâu hâi khế hơnăm, klêi mê kơmăi gá in xêh phĭu. Tơdroăng ki pro mơéa khai sinh nôkố châ liên thong ƀă tíu ki ‘măn rak mâu mơéa tíu rêh ối ƀă baoh hiâm, tơ’lêi hlâu khât. Tơkŭm AI tung pro mơéa gum pin rĕng pro klêi tâ, túa pro gá tơ’lêi hlâu tâ há”.

A tíu pêi cheăng tơdjuôm, ai 9 ngế chuyên viên ƀă 1 ngế kăn ƀô̆ bưu điê̆n pơkuâ ‘na tơdah xo ƀă mơdrếo hô sơ ing bưu chĭnh, rơtế ƀă 4 ngế đoàn viên droh rơtăm hnê tiâ pro gum kuăn pơlê. Nâ Lê Thị Nguyên Hạnh, kăn ƀô̆ bưu điê̆n, ăm ‘nâi rêm hâi nâ hnê sap ing 30 – 40 ngế kuăn pơlê xúa AI tâi tâng mâu tơdroăng pro:

“Pin kô mot tung phân mêm AI, klêi mê kuăn pơlê vâ pro mơéa klâi mê vâi tiê a tíu ki mê a kơmăi tĭnh mê kô hlo gá lo. Pơtih nâ ki kố vâ pro mơéa chêh inâi pơhlêh tơdroăng tê mơdró mê phân mêm dêi AI kô mơ’no mâu troăng vâ pơkâ thế mâu mơéa kal pro, klêi mê á kô hnê ăm kuăn pơlê vâ kuăn pơlê hbrâ tŭm mâu mơéa ki kal, klêi mê á kô hnê kuăn pơlê scan hô sơ mê ah nâp tơdrêng tung troăng hyôh internet vâ kơdroh iâ mâu tơdroăng pro mơéa ăm kăn ƀô̆ chêh pro tung dế”.

Tơbleăng pro AI tung tơdroăng cheăng tơdjuôm, bêng Tân Lập xúa péa ứng dụng, dêi Viettel ƀă VNPT. Môi ứng dụng kăn ƀô̆ chuyên viên tí tăng mơéa tung kơmăi rĕng tâ; ứng dụng ki u ối gá tơkŭm gum kuăn pơlê tí tăng tơdroăng pro mơéa ing troăng hyôh internet. Riân ing hâi lơ 1/7 troh nôkố, lối 900 hô sơ hiăng châ tơdah xo, tung mê lối 400 hồ sơ châ chêh pro, pơkâ tơdrêng, kơxô̆ ki u ối cho ing tíu pro tơdjuôm ƀă tíu pơtroh bưu chĭnh ki pơxúa. Pôa Nguyễn Mạnh Hà, Phŏ kăn hnê ngăn Vo ƀan bêng, kăn pơkuâ Tíu pro mơéa tơdjuôm bêng Tân Lập tối rơdêi, tơdroăng ki ăm AI tung pơla tơdah xo ƀă mơdrếo hô sơ ôh ti xê gum kăn ƀô̆ pơhlêh túa chêh pro tí tăng mê ối mơdêk ki rơkê tro tung tơdroăng gum kuăn pơlê pro mơéa.

“Ngin hiăng tơbleăng hnê tối troh lâp lu ăm kuăn pơlê ‘nâi. Kuăn pơlê troh pêi cheăng a Tíu pêi cheăng, ngin ăm mâu ngế ki ê hnê ăm kuăn pơlê chêh pro mâu hô sơ gá rĕng tâ. Nôkố dế chêh pro tiê ƀă kŏng, xo ah hmôi kô pro tiê ƀă kơmăi, pin pro mơéa bu kal tơpui xo ƀă kơmăi kô tơbleăng ăm”.

Tơdroăng xúa ứng dụng AI a bêng Tân Lập cho môi tơdroăng tung tơdroăng pơhlêh kơxô̆ tung lâp kong pơlê. Hâi lơ 10/7 pơla hdrối kố nah, Dak Lak hiăng păng ‘nâng pơxiâm pêi 4 tơdroăng kơxô̆ ki kal gum túa pêi kăn pơkuâ péa râ: tơdroăng tuăn ngoâ kuăn mơngế pro gum kuăn pơlê tăng, nâp hô sơ; tơdroăng pêi cheăng tơdjuôm nâp tơdrêng ing troăng hyôh internet; dashboard (ƀảng điều khiển) điều hanh tơkŭm tơdroăng pơkuâ rêm râ; ƀă tíu ki pơkâ tơleăng tơbleăng ăm pơlê pơlê.

Klêi séa ngăn khât tơdroăng xúa ứng dụng tuăn ngoâ rơke kuăn mơngế pro tung chêh pro mơdrếo mâu mơéa a mâu cheăm bêng, pôa Đỗ Hữu Huy, phŏ pơkuâ ngăn Đảng, phŏ ngế pơkuâ khu hnê mơhno ‘na mơjiâng khoa hok, kong ngê̆, pơhlêh nếo tơmiât pêi rơkê ƀă pơhlêh kơxô̆ kong pơlê Dak Lak tối rơdêi, kố cho hvêa prôk ki kal vâ mơdêk tơƀrê, xêt dêi tíu cheăng tơdjuôm tung hneăng ki nếo.

“Drêng ‘mot tơkŭm, cheăm tơdroăng cheăng cheăm hên, kơxô̆ ngế kăn ƀô̆ pêi cheăng hên la ƀă túa pêi ƀă tơdroăng cheăng pêi châ klâ xoăng ăm cheăm bêng gá hên mê tơdroăng ki xúa AI gá kal khât. Tơdroăng tơbleăng pêi m bêng cho ngế ki râng kŏng mơhno cheăng, cho ngế ki tơdrêng tơbleăng pêi mâu mơéa mê athế ‘nâi nhên ƀă hnê ăm kuăn pơlê tăng hlo tro tơdroăng ki kuăn pơlê pơkâ thế ƀă pin tăng, pro rĕng má môi”.

Tơdroăng Dak Lak hbrâ rơnáu tơbleăng AI tung chêh pro mơdrếo mơéa, pơxiâm sap ing râ cheăm, ăm hlo khŏm mơeăm pêi pro pơhlêh kăn pơkuâ kơxô̆, pơhlêh kơxô̆ tro ƀă tơdroăng gum kuăn pơlê. Kố cho hvêa prôk ki kal tung pơla mơjiâng tơdroăng cheăng rơkê plĕng, tơdrăng, tơƀrê.