Vi ƀan kong pơlê Dak Nông nếo kĭ ‘no kơxô̆ liăn 600 rơtal liăn vâ rơnêu, pro lĕm troăng kân kong pơlê 1 - troăng kân ki kal tơdjêp tơring tơkăng kong Tuy Đức ƀă tơring Dak RLâp ƀă troăng kân Hồ Chí Minh, lăm tíu xiâm kong pơlê. Tơdroăng tơkêa bro châ pêi pro sap hơnăm 2025 troh hơnăm 2028. Tiô tơdroăng kơchuâ, Troăng kân kong pơlê 1 Dak Nông kô châ rơnêu tiô pơkâ troăng kân râ má III, ƀă troăng kân rơdâ 9 met, ngiâ troăng 6 met, tâi tâng xŏn vâ chê 16 km. Hơnăm 2025, tiô tối hdrối xúa 117 rơtal liăn vâ kơjo rơnêu mâu kơpong ki tơ’nhê.

Tiô tối hdrối troh mơ’nui hơnăm 2025 kô kêi đeăng 20 – 30% kơxô̆ tơmeăm. Troăng kân kong pơlê 1 Dak Nông nôkố dế tơ’nhê râ ó, pro hâi khế pơto drô troăng xŏn vâ châ 3 xôh, tơdjâk kân troh tơdroăng rêh ối, pêt mơjiâng tơmeăm dêi kuăn pơlê ƀă tơ’lêi trâm tơdroăng ki ôh tá tơniăn.