Rơpŏng nâ Y Hiền ối a thôn Kon Vơng Kia, cheăm Măng Deang  xuân môi tiah hên mâu rơpŏng ki ê, tơdroăng rêh ối hdrối nah kơnôm a pái sao klâng, rơnó báu vâ chê tum đi đo ôh tá ai hmê kâ. Kăn ƀô̆, đảng viên lăm troh a hngêi hnê pêt kơchâi krúa, rak ngăn loăng plâi, veăng pêi cheăng tơrŭm chôa lâng pơ’lêh túa tơmiât dêi nâ: Ing pêt loăng plâi kâ, nâ Y Hiền pơ’lêh pêt vâ tê ƀă veăng ôm hyô tung kuăn pơlê:

“Kơnôm ai kăn thôn, kăn hnê ngăn Chi ƀô̆ hnê pêt kơphế, klêi mê xuân veăng tơrŭm pêt kơchâi, ing mê, rơpŏng pêi cheăng kâ hiăng hlo tơƀrê tâ”.

A Kon Vơng Kia, ki pơ’lêh ôh tá ai tiô “kơdrâ môi xôh” mê gá chôa tơbrê iâ. Drêng hdro kuăn mơngế khât, tơdroăng pêi ki khât, pêi tơbrê, kuăn pơlê pơxiâm loi ƀă pêi ƀôi. Tung hngêi nếo, mâu tơdroăng pro leh mơdĭng tiô hmâ ing nah châ pơtối rak vế.

Nôkố thôn Kon Vơng Kia ai 3 kơtum chêng koăng ƀă lối 90 ngế, tung mê, ai môi khu vâi drêng 31 ngế. Mâu lâm hnê hriâm po hnê tê kơtê, xua mâu đảng viên hnê. Tôu chêng koăng ôh ti xê to vâ “rak chôu pâ” mê ối “rak vâ rêh”. Mâu kơmăng mơ’nui măng tĭng, idrâp chêng chiâng tơmeăm ôm hyô, pro pơxúa pêi lo liăn ăm kuăn pơlê. Ing mê, môi lâm kuăn pơlê pêi chiâk pơxiâm ai - mâu ngế pêi cheăng ôm hyô.

 Đảng viên A Đruông (37 hơnăm) ngế ki apoăng pơkâ thế tâi tơnêi vâ pro homestay ngế ki pro hên ngế chiâng ía, xua ngoh hdrối nah pêi cheăng hiăng lŭp há ƀă tơdroăng pêt kơphế, xuân ối chên hâi tơvêh tâi. Hngêi tra châ ‘mâi pro chiâng tíu kâ ối pơxiâm, xuân ối rak vế lĕm krúa tíu ối dêi rơpŏng hngêi. Tung hngêi, 8 to chêng koăng ƀă 22 kơtâ châ kơtúa ‘măn a tíu ki nhoăm vâ hơ’muăn ‘na tơdroăng túa lĕm tro dêi tơná. Ngoh A Đruông tối, pro ôm hyô ôh tá xê to pêi cheăng mơdró kâ mê ối rak túa lĕm tro ton nah dêi pơlê:

“Đảng viên ôh tá tô tuăn ‘na mâu tơdroăng mơnhông cheăng kâ mê ôh tá ai châ rơkâ, vâ tối pin pêi cheăng tro lŭp, ôh tá xâu. Pin hmếo pơ pêi, đảng viên thế cho ngế ki djâ troăng ăm kuăn pơlê ngăn hlối pêi ƀối. Hiăng kơhnâ djâ troăng ahdrối mê pin tơpui kuăn pơlê hmâng vâi loi. Đảng viên xuân pơkuâ mâu khu rơpŏng. Rêm ngế đảng viên pơkuâ 4 rơpŏng. Tung mê, khu rơpŏng pơkuâ mê, hlo nôkố pêi cheăng hiăng kro mơdrŏng. Péa rơpŏng cho mâu hiăng krâ, péa rơpŏng ki tá cho mâu rơtăm. Rêm rơpŏng hbrâ pro Homestay kố. Kuăn pơlê tung khu rơpŏng mê xuân hiăng hlê choâ lâng pơ’lêh”.

Nôkố, lâp tung thôn Kon Vơng Kia ai 8 rơpŏng pro homestay, ăm hlo Kon Vơng Kia dế prôk tiô môi troăng pêi cheăng nếo. Laga, va tơ’mot ôm hyô chiâng tơdroăng cheăng kâ krá ton ƀă rak túa vêa vong lĕm tro drêng xúa pêi, hnoăng cheăng dêi đảng viên ôh ti xê to “pêi ahdrối”, mê ối cho ngế rơtế ƀă ton hơnăm. Rêm ngế đảng viên pơkuâ 5 rơpŏng kuăn pơlê, hlối hnê pêi chiâk, hlối séa ngăn, kơjo kum tah xơpá. Túa pêi cheăng mê chôa hmâ ƀă kuăn pơlê, achê kuăn pơlê,  kum hnê pêi tiô troăng hơla pơkâ “pôi tá pơtê tơdế rá”.

Rơ pŏng ngoh A Hùng, kăn thôn Kon Vơng Kia, cheăm Mang Deang hiăng ‘no liăn pro 2 homestay ƀă tai tâng kơxô̆ liăn hrĭng rơtuh liăn, tung mê ai kơxô̆ liăn mung ing hngêi rak liăn. Ngoh A Hùng ăm ‘nâi, hdrối nah hên mâu rơtăm oh tá vâ mot Đảng, la troh drêng veăng tơkŭm hôp, châ ‘nâi mâu tơdroăng, hriâm túa pêi cheăng, vâi chôa pơ’lêh tuăn tơmiât:

“Ƀă mâu rơtăm kơhnâ pêi cheăng, Chi ƀô̆ kô pro hlâu ăm mâu hok tro veăng hôp ƀă Đảng. Ing mê, mâu droh rơtăm ki kơhnâ châ hriâm, vâ hlê plĕng tơ’nôm ‘na Đảng hlối tơmâng châ hnê hên luât tŏng gum ‘na mơnhông cheăng kâ - pơlê pơla. Chôa lâng ing mê ah, mâu droh rơtăm ki mê hlê ‘na Đảng hên tâ, ah rơhêng vâ mot Đảng”.

Hên thôn, pơlê a cheăm Măng Deang dế mơhno troăng ôm hyô tung kuăn pơlê rơtế ƀă mơhno túa lĕm tro ton nah ƀă pêi chiâk xúa kơmăi ki dâi lĕm. Ing môi kơpong tơnêi kơtiê, mâu thôn, pơlê a Măng Deăng dế hlo hên ki pơ’lêh. Lâp tung cheăm Măng Deang ai 48  khu tơkŭm cheăng Đảng ƀă lối 800 ngế đảng viên. Đảng ƀô̆ cheăm tối thế mơjiâng tơkŭm rơdêi, tơ’mot ăm mot đảng viên a tâi tâng kơxô̆ ƀă ki tơƀrê, kơxô̆ đảng viên rêm hơnăm tâk 3-4%.

Pôa Nguyễn Ngọc Sơn, Kăn phŏ hê ngăn Đảng ủi cheăm Mang Deang ăm ‘nâi, thế mơdêk ki tơƀrê tung tơkŭm hôp Chi ƀô̆ ƀă hnoăng cheăng mơhno troăng ahdrối: “Ki klâi pá mê ai kăn ƀô̆, đảng viên pêi hdrối”. Tiô pôa Nguyễn Ngọc Sơn, drêng đảng viên pêi pro ahdrối, khên pêi, ‘nâi pêi ƀă pêi tơƀrê mê kuăn pơlê loi hlối pêi ƀối:

“Nâi nhên tơdroăng mơjiâng khu cheăng Đảng, đảng viên mê Đảng ƀô̆ cheăm xuân ai pơkâ chuyên đề, pơcháu ‘na khu tơrŭm cheăng Đảng, tơ’mot mâu ngế mot đảng viên tá tâi hneăng, rêm hơnăm. Đảng ƀô̆ cheăm mơnhông rơdêi vâ pơkuâ hnê pêi cheăng tơdroăng kal kí a thôn, mơdêk ivá hnoăng pơkuâ tâi tâng a thôn. Kăn ƀô̆, đảng viên thế prôk hdrối, pêi tro vâ kuăn pơlê pêi ƀối. Mâu kăn ƀô̆ pá xôp xuân hiăng rah xo nhên, mâu ngế ki ai liăn, kơhnâ pêi cheăng, mâu ki chiâng tơpui rơkê, chiâng pêi cheăng, kơhnâ pêi mâu tơdroăng cheăng a thôn, pêi cheăng kơhnâ lĕm tro.