Kơtăn ing tíu pêi cheăng Đà Lạt dâng 40km, cheăm D’ran lĕm tơdrŏm châ vâi ô eăng ối tung pơla péa to văng Ngoạn Mục ƀă D’ran (hdrối nah ối tung tơring Đơn Dương, kong pơlê Lâm Đồng ton), tíu kố ối ai inâi khĕn ki ê cho pơlê kân Lưng Đèo. Cheăm D’ran, kong pơlê Lâm Đồng châ mơjiâng tiô túa ‘mot tơkŭm cheăm Lạc Xuân ƀă pơlê kân D’ran, ai ƀăng tơnêi kân lối 240 km2, pơ’leăng mâ mơngế cho 33.000 ngế, tung mê lối 20% cho hdroâng kuăn ngo K’Ho, Chu ru, Mạ, Nùng, Thái ƀă hên ki ê. Đảng ƀô̆ cheăm nôkố ai 51 chi ƀô̆ ƀă lối 600 ngế đảng viên, cho mâu ngế ki kal tung pơkuâ mơnhông cheăng kâ rêh ối a cheăm.

Pôa Trương Quang Kiên, Phŏ kăn hnê ngăn Vi ƀan cheăm D’ran, ăm ‘nâi, kăn ƀô̆, đảng viên ƀă Kuăn pơlê cheăm tơngah Hneăng hôp XIV dêi Đảng kô ai mâu troăng hơlâ tŏng gum pơxúa ƀă kơpong kuăn pơlê hdroâng kuăn ngo:

“Cheăm lối 20% cho kuăn pơlê hdroâng kuăn ngo. Rơhêng vâ Hneăng hôp Đảng kô ai mâu troăng pơkâ ‘na troăng tŏng gum tơmâng ngăn ăm mâu kơpong kuăn pơlê hdroâng kuăn ngo. Ai troăng hơlâ pơkâ xiâm ƀă mâu kơpong kuăn pơlê hdroâng kuăn ngo a cheăm vâ pro tiah lâi tŏng gum vâi krâ nhŏng o ‘na mơnhông cheăng kâ rêh ối vâ mơdêk pêi lo liăn tung kơpong kuăn pơlê hdroâng kuăn ngo”.

Hơnăm 2025, tâi tâng liăn nâp ăm tơnêi têa dêi cheăm D’ran, kong pơlê Lâm Đồng châ lối 192 rơtal, luâ kơxô̆ liăn liăn kong pơlê pơcháu. Kố cho ivá ki kal vâ D’ran mot tung hneăng mơnhông nếo ƀă hên tơdroăng pơkâ pêi ki kân tung hơnăm 2026, ing mơnhông cheăng kâ rêh ối, rak tơniăn tŭm ăm tơdroăng rêh ối, tơmeăm khoăng, liăn ngân, hiâm mơno kuăn pơlê. Pôa Mai Linh Sơn, Kăn hnê ngăn Vi ƀan Măt trâ̆n Tơnêi têa Việt Nam cheăm D’ran, tối rơdêi tơdroăng tơngah loi dêi Kuăn pơlê a Hneăng hôp XIV dêi Đảng, malối cho tung pơla tơbleăng pêi túa pơkâ kăn pơkuâ 2 râ, tơniăn tro tơdroăng achê kuăn pơlê, nhuô̆m kuăn pơlê xua kuăn pơlê:

“Á loi, tơngah khât a Hneăng hôp 14 dêi Đảng. Á xuân môi tuah Kuăn pơlê loi tơngah khât tung la ngiâ. Ƀă túa pơkâ pêi nôkố pin dế pêi pro túa cheăng kăn pơkuâ 2 râ cho rak tơniăn tro tơdroăng achê kuăn pơlê, nhuô̆m kuăn pơlê ƀă pêi châ tơdroăng kuăn pơlê púi rơhêng vâ. Drêng Pơkâ Hneăng hôp 14 dêi Đảng châ pêi pro mơdêk tơdroăng rêh kâ ối dêi Kuăn pơlê ƀă mơnhông cheăng kâ rêh ối pơlê pơla dêi cheăm, dêi tơnêi têa rế hía rế mơnhông. Mơdêk hnoăng cheăng dêi mâu kăn ƀô̆, kong chưk hlê plĕng, pôu râng dêi hnoăng pêi pro túa pơkuâ, hnoăng cheăng châ Đảng, Tơnêi têa pơcháu”.

Lâm Đồng nôkố cho kong pơlê ai ƀăng tơnêi kân má môi Việt Nam ƀă lối 24.200 km2, pơ’leăng mâ mơngế lối 3,8 rơtuh ngế. Đảng ƀô̆ kong pơlê Lâm Đồng nôkố ai lối 124 rơpâu ngế đảng viên pêi cheăng a 128 khu tơrŭm cheăng. Ƀă tơdroăng loi khât tung pơkuâ dêi Đảng, kăn ƀô̆, đảng viên ƀă Kuăn pơlê kong pơlê Lâm Đồng tơngah Hneăng hôp XIV dêi Đảng po troăng hơlâ, tơdroăng pơkâ mơnhông ăm tơnêi têa ƀă mâu kong pơlê mot tung chal mơnhông nếo.