Drêng kuăn pơlê mot a Tíu xiâm pro mơ-éa cheăng kâ rêh ối ƀă tơnêi têa bêng Hội Phú, kong pơlê Gia Lai, rô bốt AI hiăng koh, kơnó ‘nâi tơdroăng kal vâ ƀă hnê mơhno pêi pro mâu mơ-éa cheăng kâ rêh ối ƀă tơnêi têa. Kố cho rơkong robot hnê mơhno 2 ngế ối nếo troh pro mơ-éa pơkoăng:

‘’Vâ pro mơ-éa pơkoăng, êh kal hbrâ mơ-éa chêh kĭ pơkoăng tiô mâuh tơdah a tíu xoăng mơ-éa, kăn kươk kŏng yân ối xêt vâ mơnhên dêi châ chăn, mơnhên tíu ối dêi kơdrâi, kơnốu, pơkâ kơnốu sap ing tŭm 20 hơnăm, kơdrâi sap ing tŭm 18 hơnăm’’.

Ƀă tơdroăng ki chiâng ti tăng ƀă tiâ mâu tơdroăng kơ-êng tơdjâk troh pro mơ-éa pơkoăng, hnoăng xúa tơnêi, mơjiâng hngêi trăng, tíu ối ƀă hía hé, robot AI gum kuăn pơlê ‘nâi nhên tơdroăng hô sơ, tơdroăng pêi pro xuân môi tiah tíu tơdah hô sơ rĕng má môi, tơ’lêi hlâu. Pôa Nguyễn Mạnh Thi troh lăm pro mơ-éa vâ pơhlêh xúa tơnêi tối ăm ‘nâi, châ tâ tơdroăng ki nếo kố pôa ôh tá ƀĕng ê:

“Hnê mơhno ăm á cho lĕm tro ‘nâng, troh tíu koh kơ-êng á, pơtih môi tiah troh a tíu ki lâi vâ pro mơ-éa ki klâi mê robot kô djâ pin troh tíu mê. Mơngế hơnăm hiăng hên ai ngế ôh tá ‘nâi tiê kơxô̆ mê pin vâ troh tíu mơdrếo mơ-éa hiăng klêi pro lơ peăng tơnêi tơníu mơjiâng pro tơmeăm mê pin tối ƀă robot kô hnê mơhno pin troh a tíu pro mơ-éa mê’’.

Tiô pôa Trần Công Danh, kăn ƀô̆ Tíu xiâm pro mơ-éa cheăng kâ rêh ối ƀă tơnêi têa bêng Hội Phú, robot AI rơkê châ Vi ƀan bêng mơ’no liăn ƀă djâ ăm xúa hdrối khế 8/2025. Vâ xúa châ tơƀrê, robot châ tơ’mot hên ‘noăng chư chêh tơdjâk troh pro mơ-éa cheăng kâ rêh ối ƀă tơnêi têa, khu hô sơ, troăng pêi pro ƀă đi đo châ ‘’hnê pơtâp’’ vâ mơdêk ivá tơpui ƀă kuăn pơlê.

‘’Robot AI kô châ tơ’mot ‘noăng chư chêh tơdjâk troh pro mơ-éa cheăng kâ rêh ối ƀă tơnêi têa gum ăm kuăn pơlê tơ’lêi hlâu tung tơdroăng ti tăng. Tơdroăng apoăng ngin tơ’mot ‘noăng chư chêh pro mơ-éa cheăng kâ rêh ối ƀă tơnêi têa, mâu mơ-éa ki kal ƀă troăng pêi pro mâu mơ-éa, troăng xo kơxô̆, hnê mơhno kuăn pơlê troh mâu tíu pro mơ-éa vâ pêi pro mâu mơ-éa ki pin kal djâ mâu tơdroăng kal ‘noăng chư chêh tơdjâk vâ robot kơnó ƀă hlê plĕng, xuân môi tiah đi đo hnê pơtâp vâ robot pêi hlâu mâu tơdroăng cheăng’’.

Tiô riên ngăn, tơdâng rêm hâi robot AI a bêng Hội Phú tŏng gum, hnê mơhno ăm lối 100 roh ngế kuăn pơlê troh pro mơ-éa cheăng kâ rêh ối ƀă tơnêi têa.

Kơnôm tơdroăng tŏng gum dêi AI, kơxô̆ pro mơ-éa hô sơ ƀă mơdrếo mơ-éa ki hiăng klêi tro hâi tơkêa a Tí xiâm pro mơ-éa cheăng kâ rêh ối ƀă tơnêi têa bêng Hội Phú hên khế pơtối châ lối 95%. Pôa Hoàng Minh Nghĩa, Phŏ Kăn hnê ngăn Vi ƀan bêng Hội Phú, mơnhên tơdroăng xúa kŏng ngê̆ AI hiăng djâ ăm pơxúa châ tơƀrê inhên tung pơhlêh pro mơ-éa a bêng, po troăng châ achê nếo, tiô rơxông nếo, lĕm tâ tung pro mơ-éa ăm kuăn pơlê, khu tê mơdró.

‘’Kơmăi hiăng hnê mơhno tơtro má môi, ‘noăng chư chêh hiăng châ chêh tơ’mot tung kơmăi tơtro mê kuăn pơlê hâk vâ ‘nâng. Mâu ngế pêi cheăng kô ai hên chô tơmiât pêi cheăng xua teăng ki tiâ. Tâng thế tiâ mê kô ton chôu pêi cheăng, nôkố kơmăi robot tŏng gum mơngế pêi cheăng tơmiât to pêi cheăng mê kơxô̆ tơdroăng cheăng châ pro hên tâ hô sơ ăm kăn pơlê, tơleăng rĕng bă kơdroh ki tơdroăng cheăng lối hên’’.