A siêu thị Co.opMart Pleiku, kong pơlê Gia Lai, tơdroăng ki roê kế tơmeăm hlo hơniâp ro khât. Mâu kơbong tơbleăng tê tơmeăm châ ‘măn chôu lĕm, krúa ƀă tŭm mâu túa tơmeăm ing kế kâ, kế xúa troh mâu kế tơmeăm kal ki ê. Mâu tơmeăm pơrá châ séa ngăn nhên hdrối vâ châ tơbleăng tê, tơniăn xiâm rêi, tíu mơjiâng pro. Jâ Châu Hoàng Thy, phŏ kăn pơkuâ siêu thị Co.opMart Pleiku, tối:

“A siêu thị kế tơmeăm tơbleăng tê gá hên hĭn, mâu kế tơmeăm dêi mâu khu ki tê châ vâi loi ai chưng chih ISO 9000, mâu kế tơmeăm ki châ vâi tơngah dâi lĕm. Ngin đi đo tơmiât troh mâu ngế ki roê kâ, ‘na pơkuâ ngăn ki dâi lĕm dêi mâu kế tơmeăm ki roê ‘mot tá troh mâu rôh ki mơđah tê, rak ngăn kế tơmeăm ‘măn a tíu tê đi đo dâi lĕm, ôh tá ăm mâu tơmeăm tro pêak, tơ’nhiê, kĭ tơkêa ƀă khu ki tê ai chưng chih châ kơ koan Tơnêi têa hbru ăm”.

Ôh ti xê to a mâu siêu thị ki kân, tơdroăng ki rak vế xiâm kối kế tơmeăm xuân châ mâu khu ki roê tê a kong pơlê tơtrŏng. Nâ Trần Thị Kim Huế, ngế ki pơkuâ môi tíu tê tơmeăm Sơn Huế a pơlê kân Čư̆ Ty, tơring Đức Cơ, tối rơhêng vâ khu ki ai tơdjâk troh séa ngăn nhên tâ mâu ƀâng ki tê tơmeăm online ƀă tơmeăm roê ing tơkăng kong vâ rak vế ăm mâu ngế ki tê mơdró tro luât.

“Á tê mâu tơmeăm ki kŏng ti pơcháu, ai mơéa mơnhên ki krúa lĕm ‘na mâu kế kâ, mơéa mơnhên krúa tơmeăm kâ mê á nếo roê. Tơmeăm ki ôh ti ai xiâm kối mơjiâng pro mê á xuân ôh tá vâ roê xo xua kuăn pơlê nôkố vâi rơkê plĕng khât, tâng roê tơmeăm ki ôh ti ai tíu mơjiâng pro, ôh ti ai inâi mê vâi ôh ti vâ roê”.

Tung pơla po rôh ki lăm séa ngăn cho ing hâi lơ 15/5 troh lơ 15/6, khu ki ai tơdjâk troh kong pơlê Gia Lai hiăng châ hlo dâng 90 rôh ngế pro xôi, pơxâu phâk liăn tâi tâng lối 1,7 rơtal. Ki rơhêng vâ tối, Kŏng an kong pơlê hiăng châ hlo ƀă pơsăm tối 2 rôh ngế tê mơdró, mơjiâng pro kơphế ôh ti xê khât. Môi rôh ki tơdjâk troh phon rtơvât ƀă pơkeăng xôh kơdê oâ hdrong xuân dế pơtối séa ngăn vâ pơxâu phâk kơtăng.  Pôa Lê Hồng Hà, ngế xiâm ngăn kơchô tê mơdró kong pơlê Gia Lai, ăm ‘nâi:

“Tung tơdroăng hnê mơhno dêi Ngế pro xiâm hnê ngăn Chin phuh ‘na tơdroăng ki po rôh lăm séa ngăn mâu tơdroăng ki tơdjâk troh kế tơmeăm kuăn pơlê xúa mê cho mâu kế kâ tối tơdjuôm ƀă mâu pơkeăng xúa, pơkeăng ôh ti xê khât dế châ tê hên hĭn a kơchô tê mơdró. Khu hnê mơhno ƀă tôh pêi hnoăng cheăng dêi kong pơlê Gia Lai tơkŭm tung mâu tơdroăng cheăng ki mê. Pakĭng kong pơlê xuân hnê mơhno tơkŭm tung mâu kơvâ cheăng ki ê môi tiah têa châu têa kơxăng, phon rơvât, pơkeăng xôh kơdê oâ hdrong vâ hbrâ mơdât ƀă rak vế hnoăng pơxúa tro luât ăm kuăn pơlê ƀă khu mơdró kâ tê mơdró tung kong pơlê”.

Ôh ti xê pơtê to a kơvâ tê mơdró, kơvâ ngăn pơkeăng pơlât kong pơlê Gia Lai hiăng lăm séa ngăn rơdêi tung tơdroăng ki pơxâu phâk. Khu ngăn pơkeăng pơlât kong pơlê hiăng mơjiâng 2 tôh lăm ngăn ‘na tơdroăng tê mơdró pơkeăng, phom kơlơn ƀă mâu kế kâ. Klêi ngăn a mâu kong pơlê môi tiah pơlê kong Pleiku, tơring Đức Cơ, Ia Pa ƀă pơlê kong krâm Ayun Pa, hiăng châ hlo 5 tíu pro xôi. Mâu tơdroăng mê mê ki hên cho ôh tá pêi pro tơdroăng tơbleăng tơmeăm, rak vế tro tơdroăng ki chêh a tơdrong ƀă ôh ti ai kơƀeăng tơbleăng kơpong rak vế. Jâ Ksor Pa, phŏ kăn pơkuâ Khu ngăn pơkeăng pơlât kong pơlê Gia Lai tối nhên:

“Tung la ngiâ ah Khu kô pơtối rak vế cheăng vâ rak vế châ rak ki xêt dêi pơkeăng, phom kơlơn ƀă kế kâ ăm kuăn pơlê a kong pơlê. Ƀă khŏm mơeăm pôi tá ai kơpong ki mơdât, pơxâu phâk tro tơdroăng pơkâ ƀă kơlo, đi đo tung khu séa ngăn mơjiâng ai séa ngăn, pơkuâ ngăn chô tê mơdró, kŏng an tung khu mê mâu tơdroăng séa ngăn klêi pơxâu phâk pơrá châ tơbleăng ăm râ kơpêng vâ mơ’no tơdroăng pơxâu phâk teăm tơdrêng”.

Mâu ivá mơeăm tơdâng tơ’mô sap ing mâu khu râ, kơvâ cheăng a Gia Lai hiăng mơdêk hlê plĕng dêi kuăn pơlê, khu mơdró kâ tung tơdroăng ki pêi pro tiô luât, tơdrêng amê hlối pro tơdroăng ki tê mơdró chiâng rơdêi, tơniăn ƀă tơdrăng.