Hneăng hôp ai mâu Jâ Nôu Việt Nam khên tơnôu, nôu pâ lơ on veăng nhŏng o xiâm dêi mơngế hlâ ai hnoăng ƀă vâ chê 200 ngế teăng mâ ăm lối 7.000 ngế tung lâp tơnêi têa.

Tơbleăng tơdroăng cheăng hiăng pêi châ tơƀrê tung hneăng hơnăm 2020-2025 ăm hlo Khu kơjo kum hiăng tơbleăng pêi hên tơdroăng hơ-ui pâ ki ai pơxúa khât, hriĕn ki nếo, pêi tơƀrê tơxâng mơnê; tâi tâng mâu tơdroăng pơkâ xuân hiăng pêi klêi ƀă hên tơdroăng pêi pro luâ pơkâ môi tiah tí tăng ‘nâi plĕng, tơtro tơdjêp ƀă, ‘mâi rơnêu mâu tơdroăng chêh a tíu meăm tâ chiâng inâi mơngế hlâ, kơjo kum chơ châ tíu ê kơxêng kiâ mâu ki hlâ, pro hngêi tuăn pâ, hbru tơmeăm ƀă pêi tơdroăng tŏng gum.

Mâu tơdroăng pêi pro dêi Khu kố kum tro tiô hnê mơhno, hên ngế rế pâ thăm mơhno, chiâng tíu ki loi tơngah khât dêi mơngế ki ai ngế hlâ ai hnoăng, tơkŭm po, khu mơdró ƀă cho tiú ki tơdjêp pơla Đảng, Tơnêi têa ƀă rơpŏng hngêi mơngế ai on veăng lơ kuăn ‘nĕng hlâ ai hnoăng, veăng tơbleăng lâp lu tuăn pâ tung tơnêi têa ƀă lâp plâi tơnêi.