Mơnhên tối ‘na tơdroăng pơreăng xông tâ tú hơnăm kố, Phŏ Yăo sư – Tiê̆n sih Trần Đắc Phu, cho Kăn pơkuâ Khu xiâm khăm pơlât ƀă ngăn pơkeăng hbrâ mơdât pơreăng tối, pơreăng kố nôkố ôh tá tiô rơnó tiô hdrối nah xếo. Tâng môi tiah hdrối nah pơreăng hmâ xông tâ tú rơdêi a rơnó mêi klêi mê kơdroh chôa ‘lâng, mê nôkố kơxô̆ mơngế tro tâ pơreăng châ hlo plâ hơnăm, tá tung rơnó tô khăng khoăng, ăm hlo pơreăng đi đo xông tâ tú tung pơlê pơla:

“Tơdroăng tơ’lêi xông tâ tú mê nôkố pơxiâm hlo tâk hên kơxô̆ mơngế tro tâ tâng pơchông ƀă rôh kố hơnăm nah, tơdroăng ki pá vâ ‘nâi hdrối gá tro tâ xua ôh tá ai roh vâ pin tối hdrối tâng pơchông ƀă hdrối nah. Hơnăm kố ai mâu tơdroăng ki ôh tá tơ’lêi hlâu, môi tiah tơdroăng ‘na kong prâi, tơdroăng prôk lăm kuăn pơlê xuân tâk hên. Ƀă kong tôu ‘nâng, mêi hên, kong prâi lối 25 đô̆ pro pro tơ’lêi hlâu ăm tro trô tơngê lo mơheăm chiâng ai kuăn hên’’.

A Pơlê kong kân Hồ Chí Minh hiăng ai kơxô̆ mơngế tro râ pơreăng tơngê lo mơheăm hên má môi lâp tơnêi têa, krê troh khế 6/2026, hiăng châ hlo 18 rơpâu ngế tro tâ pơreăng ƀă 4 ngế hlâ. Mâu ngế tro tâ pơreăng xông tâ tú a tâi tâng mâu kong pơlê. Tiô kơvâ khăm pơlât pơlê kong kân, pơreăng tơngê lo mơheăm hơnăm kố tâk rĕng tâng pơchông ƀă tiah hmâ. Môi tơdroăng ki tơtrŏng má môi cho mơngế tro tâ pơreăng dế ai tơdroăng pơhlêh. Nôkố, lối tơdế kơxô̆ mơngế tro tâ cho mơngế kân, tung mê, khu ki sap ing 11 troh 30 hơnăm châ hên. Tơdroăng kố ăm hlo tơngê lo mơheăm ôh tá xê to pơreăng ki a vâi hdrêng môi tiah hên ngế hmâ tơmiât.

Tiê̆n sih, ƀok thái pơkeăng Trương Hữu Khanh, Phŏ Kăn hnê ngăn liên chi hô̆i pơreăng xông tâ tú a Pơlê kong kân Hồ Chí Minh, pơchân tối:

“Ki má lối dêi tơngê lo mơheăm mê cho hâi tâi tơngê xuân ối chiâng kơdrâ tơngê. Xua mê ngế tơngê lo mơheăm mê hiăng tâi tơngê laga thế châ tơniăn lĕm, prôk lăm tiah hmâ, ôh tá ai ki klâi tối cho tơbrê tơbrêh mê nếo tối cho tơniăn. Ƀă tâng môi tiah ngế ki mê tâi tơngê mê rơbĕn rơbâp đi đo, tối pôu prĭng ko, châi klêa lơ tơbrêi tơbrêh, ôh tá hêng kâ hmê kô tơ’lêi chiâng kơdrâ tơngê. Xua mê pin thế séa ngăn kơtê, mơheăm kơtâu. Klêi mê thế lăm khăm mơhé hiăng tâi tơngê’’.

Mâu ngế ki rơkê mơnhên tối, hên kuăn pơlê xuân ôh tá bê tơmâng ƀă pơreăng kố. Hên ngế pơlât xêh a hngêi lơ troh a tíu khăm pơlât hrá xua tối kố bu pơreăng tơngê tiah hmâ. Tơdrêng amê, tơngê lo mơheăm kô chiâng rĕng ‘nâng, pro kơdrâ tơngê, lo mơheăm hên, châi lâp tung châ ƀă chiâng hlâ tâng ôh tá châ rĕng châ hlo, pơlât teăm tơdrêng. Pôa Võ Hải Sơn, Phŏ Kăn pơkuâ Kơ koan xiâm hbrâ mơdât pơreăng, Khu xiâm pơkuâ ngăn khăm pơlât ƀă pơkeăng tối ăm ‘nâi, kuăn pơlê xuân kal châ tah lôi mâu troăng tơmiât ki ôh tá tro môi tiah tối tri trôu ai pơreăng bu ai kuăn a tíu têa ‘mêi lơ ngế ki rêh tung kơpong hngêi ki kơdrâm mơngế, hngêi xŏn râ kô iâ tro tâ pơreăng.

Ing tơdroăng ki ai khât mê, tri trôu ai kuăn tung mâu tơmeăm ‘măn hdoăng têa krúa tung hngêi rơpŏng môi tiah kơƀin reăng, kơ’lo pêt loăng ki mơnâ mâ ngăn, tng tíu hdoăng kơtuh hngíu lơ mâu tơmeăm hdoăng têa kŭn.

“Tơdroăng ki pơtâng hnê tối dêi hơnăm kố cho ôh tá ăm ai kiâ ngu ngĕng mê ôh tá ai tơngê lo mơheăm. Ƀă ngin xuân pói vâ cho rêm rơpŏng rêm măng tĭng mơdoh 10 phut vâ séa ngăn pâu kiâ ngu ngĕng, hré nang tung rơpŏng’’.

Tơngê lo mơheăm cho pơreăng ki rơ-iô laga kô chiâng vâ hbrâ mơdât tâng rêm ngế kuăn pơlê mơdêk hlê plĕng rak ngăn ivá châ chăn ƀă pơlê pơla; đi đo tah pơhlêh têa tung kơƀin reăng; gô̆m trếo ki ‘mêi ƀă kơduôp mâu tơmeăm ki ôh tá xúa. Tơdrêng amê, kuăn pơlê kal koi kât kơmung, xúa mâu troăng mơdât tri trôu pâk ƀă tơrŭm ƀă kơvâ khăm pơlât tung mâu tơdroăng mơgrúa kong prâi, kơdê kiâ ngu ngĕng, hré nang tung rơpŏng, pơlê pơla.