A Dak Lak, ki má môi cho kơmăng countdown (riên chôu vêh tơrôu) a Plông kân 10/3, bêng Buôn Ma Thuột kơmăng lơ 31/12 ƀă tơdroăng ngê̆ thuât ƀă dó inâi ‘’Eăng lĕm Dak Lak – Koh hơnăm nếo 2026’’. tơdroăng kố châ pro inhên mơdoh hên chôu, hlối ai nhak, on bâ eăng ƀă kŏng ngê̆ rơxông nếo, ƀă tơdroăng ki veăng dêi hên ka sih, khu xah nhak, khu kohnhon xuăng, DJ ƀă khu ki mơđah tơbleăng ki rơkê.

Rơtế ƀă mê, kơxo hâi lơ 1/1/2026, a Mũi Đại Lãnh (Mũi Điện) cheăm Hòa Xuân, kô tơkŭm po leh koh hlá cơ apoăng nếo, ƀă tơdroăng tơdah mâu tơmối apoăng troh lăm ngăn tơnêi tơníu kong kế châ ngăn cho tíu tơdah mâ hâi pơxiâm lo rĕng má môi a tơnêi ‘lâng Việt Nam. A kố, tơkŭm po tơdroăng ngê̆ thuât koh hơnăm nếo, ƀă mâu tơdroăng mơđah tơbleăng prôa, têng nêng, koăng riâ, klŏng put, hdroâng kuăn ngo, prôa tơnĭng ƀă mâu tơdroăng diâp kơxuô tơmeăm ăm tơmối ôm hyô.

Kong măng lơ 31/12, kong pơlê Gia Lai tơkŭm po mơ’no tơdrêng tơdroăng Countdown Têt Dương lịch 2026, pro chiâng tơdroăng mơdĭng ki hơniâp ro, tơdjâk hiâm mơno tơrŭm, ro ƀă rơhêng vâ mơnhông. Tơdroăng kố ai inâi “Têk bâ plâi nuih – Tơdjêp tơdroăng pâ”, mơ’no tơdrêng tung um tơvi a péa tíu: Plông kân Nguyễn Tất Thành (bêng Quy Nhơn) ƀă Plông kân Đại Đoàn Kết (bêng Pleiku), ƀă tơdroăng ngê̆ thuât châ mơjiâng pro krâu, hlối ai tơdroăng hơdruê xuăng tiô chal nôkố, mâu kơxái pul on ƀă um tơvi LED ki kân.

Malối, a tíu mơđah Pleiku, túa lĕm tro Tây Nguyên châ pơ-ôu tơdroăng tŏn chêng koăng, kơhnhon xuăng ƀă mâu ƀai hơdruê xuăng ‘na kong kế, ngo ngối, mơhno ki tơrŭm tro pơla chal krâ ƀă chal nôkố. Ing tơdroăng po túa lĕm tro, kong pơlê Gia Lai tơngah pro chiâng tơdroăng ki xiâm tung mơđah tơbleăng um, ivá mơnhông tơƀrê ăm hơnăm 2026, Gia Lai tơkŭm po Hơnăm Ôm hyô tơnêi têa.

Kong pơlê Quảng Ngãi tơkŭm po tơdroăng ki kal mơhno khôi túa lĕm tro, ôm hyô tơkŭm po tơdrêng amê a kơpong kĭng têa kơxĭ ƀă kơpong kong ngo. Tơdroăng ngê̆ thuât ‘’Quảng Ngãi – Koh hơnăm nếo 2026’’ tơkŭm po kơmăng lơ 31/12 a 2 tíu: Plông kân troăng Phạm Văn Đồng, bêng Cẩm Thành ƀă dó inâi ‘’Tơdroăng pói vâ têa kơxĭ kân’’ ƀă Plông kân 16/3, bêng Kon Tum ƀă dó inâi ‘’Hiâm kơpong kân rơdâ’’.

Pơtối mê, Măng tĭng Khôi túa lĕm tro – Ôm hyô Măng Deang ƀă dó inâi ‘’Mơngiơk khêi tung dế kơpong kân rơdâ’’ tơkŭm po sap hâi lơ 1-4/1/2026, a cheăm Măng Deang. Măng tĭng kố ối ai leh hô̆i pơto Pong Pŏng kân, tơdroăng ngê̆ thuât ‘’Măng Deang hâi nếo’’, kơchơ tơmeăm khoăng pêi lo ing chiâk deăng – pơkeăng Măng Deang 2026, châ hlo hơ’lâk kơphế ƀă kŏng ƀă ôu kơphế ki kơhiâm má môi, rơtế mâu tour ôm hyô ngăn loăng pơlái kong kế.