Tung 5 hơnăm hdrối, tíu pêi cheăng hiăng chêh vâ chê 12.000 hlá tơbeăng, mơ’no tung hyôh dêi Rơ’jiu Xiâm Việt Nam ƀă mâu tơdroăng mơ’no nâl kuăn ngo a mê. Pôa Lê Hải Sơn, Kăn hnê ngăn Đảng ủy, ngế pơkuâ tíu pêi cheăng tối nhên, tíu pêi cheăng đi đo ngăn tơdroăng tơpui mơ’no nâl kuăn ngo cho tơdroăng cheăng ki xiâm, vâ djâ rơkong tơpui dêi Đảng, Tơnêi têa troh ƀă lối 2 rơtuh ngế kuăn ngo a Tây Nguyên ƀă mâu kơpong ki achê.

Hnê tối a hneăng Hôp, pôa Nguyễn Văn Chí, Phŏ Kăn pơkuâ hnê ngăn cheăng Đảng ủy Rơ’jíu xiâm Việt Nam pơkâ thế tíu pêi cheăng hbrâ ‘na mơngế pêi cheăng thế tơtro ƀă tơdroăng tơ’mot dêi kong pơlê; pơ’lêh nếo tơdroăng hnê tối ăm hdroâng kuăn ngo; mơdêk tơƀrê xúa khoa hok kŏng ngê̆ tung pêi chiâk, pêi cheăng ki kố ki mê, vâ pêi tiô túa pơkâ “Hlá tơbeăng nếo nôkố, rak ngăn rơkê plĕng, tiô kih thuât kơxô̆”.