A rôh hôp, Hô̆i đong kuăn pơlê kong pơlê môi tuăn mâu tơdroăng chêh tung hlá mơ-éa ki kal, mê cho: Kĭ pơkâ liăn ngân kong pơlê hơnăm 2025; Pơkâ mơnhông cheăng kâ - pơlê pơla 5 hơnăm pơla hơnăm 2026-2030;  tah hlá mơ-éa pơkâ ‘na râ kơpêng pơkâ kĭ tơdroăng cheăng ƀă hbrâ liăn ngân hrê đi đo liăn ngân tơnêi têa tung kong pơlê; ‘mâi hơ’lêh, tơ’nôm mâu pơkâ ‘na tơdroăng ki mơnhên tơrêm túa tơnêi ƀă kơƀăng tâ yă mâu túa tơnêi hơnăm 2026; pơkâ tro tiô luât; pơkâ luât tŏng kum mâu ngế ki xúa tơdroăng ‘mé prâu châ mâu ki hlâ tung kong pơlê.

‘Na tơdroăng xing xoăng rế lĕm tíu pêi cheăng rêm râ ƀă 1 hơnăm pêi cheăng dêi mâu kăn kong pơlê 2 râ, tơbleăng a rôh hôp xâu ối mâu tơdroăng pá. Tung mê, mâu hồ sơ, tơdroăng chêh ‘măn tung kơmăi hâi ai tŭm; ivá pêi cheăng, túa pêi cheăng, tơdroăng cheăng dêi mâu ngế tung kăn ƀô̆ tung tơdroăng tơdah xo tơdroăng cheăng ối pá. Mâu tíu ki ‘nâ ôh tá ai tŭm mơngế pêi cheăng a kơvâ cheăng tro tơdroăng tơná pêi môi tiah ‘na tơnêi tíu, mơjiâng, liăn ngân, kŏng ngê̆ thông tin ƀă pơ‘lêh kơxô̆. Tơdroăng hâi châ pơcháu biên chê̆ khât klêi xĭng xoăng pro rế lĕm xuân pá tung tơdroăng mơhno xoăng, rah xo ƀă xúa kăn ƀô̆, kong chưk râ cheăm.