Kơxo hâi lơ 13/1, a Tíu xiâm po Rôh hôp Tơnêi têa, pôa Trần Cẩm Tú, Ngế cheăng tung Khu xiâm kal kí, Kăn pơkuâ hnê ngăn Đảng ki ai mâ đi đo, Ngế xiâm ngăn Tiêuh ƀan Tơkŭm po Hneăng hôp khu kăn lâp tơnêi têa rôh má XIV dêi Đảng hiăng pơkuâ po rôh lăm ngăn mâu tơdroăng cheăng hbrâ rơnáu ăm tơdroăng cheăng tơkŭm po ki kal dêi tơnêi têa.

Kăn pơkuâ ngăn Đảng hiăng lăm ngăn cheăng rơnuâ, pro a hô̆i trương; troăng klông Tíu cheăng chêh Hlá tơbeăng, Tíu cheăng Khu hnê mơhno dêi Khu xiâm ngăn Kŏng an, mâu ƀơrô cheăng ki ai tơdjâk, cheăng khăm pơlât ƀă mâu túa pơkâ rak vế tơniăn gâk kring, tơniăn. Klêi kơ’nâi lăm ngăn, mâu tơdroăng ki kal hiăng pêi châ tiô tơdroăng pơkâ thế, tơdroăng ki pơkâ mơ’no. Kăn pơkuâ hnê ngăn Đảng pơkâ thế mâu tíu pêi cheăng pơtối tơrŭm krá tơniăn, séa ngăn nhên vâ ‘mêng pro tơrêm tơdroăng cheăng, hbrâ rơnáu krâu ăm rôh kĭ tơkêa Hneăng hôp Đảng. Ƀă mâu tơdroăng ki pâ thế klêi kơ’nâi mơnúa, Kăn pơkuâ ngăn Đảng pơkâ thế mâu khu xiâm, kơvâ cheăng rĕng tơrŭm tŏng gum, pêi pro kơtăng túa pơkâ, tơdroăng pơkâ pêi tro má môi cho ăm Hneăng hôp khu kăn lâp tơnêi têa rôh má XIV dêi Đảng châ po ƀlêi chiâng, tơniăn, krip ƀă tro tiô tơdroăng pơkâ thế ‘na kal kí.