Kong xêi hâi lơ 14/7, a tíu pêi cheăng dêi Kăn xiâm hnê ngăn, pôa Võ Văn Thưởng, Kăn xiâm hnê ngăn tơnêi têa diâp Ƀâng pôk Ngế tơpui tơleăng hngêi tơleăng xiâm tơnêi têa ăm pôa Nguyễn Hồng Nam, Ngế xiâm tơpui tơleăng râ má 1, Kăn xiâm phŏ ngăn Hngêi tơleăng tơnêi têa a Hà Nội. Rơkâu hâk pôa Nguyễn Hồng Nam châ Đảng, Tơnêi têa loi tơngah pơcháu hnoăng cheăng Tơpui tơleăng xâm dêi Hngêi tơleăng xiâm tơnêi têa, pôa Võ Văn Thưởng ai tối tiah kố, kố cho tơdroăng ki phiu ro kân, hâk tơngăm, tơdrêng amê, xuân cho pôu râng hnoăng cheăng ki kân ăm pôa Nguyễn Hồng Nam.

Kăn xiâm hnê ngăn tơnêi têa loi tơngah, pôa Nguyễn Hồng Nam kô pơtối mơdêk hnoăng cheăng ki khên tơnôu dêi kơvâ ngăn ‘na Hngêi tơleăng xiâm tơnêi têa, kơdo mơ-eăm pêi pro rơkê kơnía khât hnoăng cheăng hiăng châ pơcháu, tơxâng ƀă hiâm tuăn loi tơngah dêi Đảng, dêi tơnêi têa, kuăn pơlê ƀă kăn ƀô̆, ƀă mơngế cheăng dêi kơvâ tơleăng.

Pôa Nguyễn Hồng Nam mơhno tối tơdroăng ki hâk tơngah ƀă ƀriê phoih tung hiâm mơno drêng châ Kăn xiâm tơnêi têa diâp Hlá mơ-eá pôk pro Ngế xiâm tơleăng dêi Hngêi tơleăng xiâm tơnêi têa, tơdrêng amê, hnối tơmâng xo ƀă pêi pro tŭm têk hnoăng cheăng hnê tối dêi Kăn xiâm hnê ngăn tơnêi têa, tơhrâ a ngiâ Kăn xiâm hnê ngăn tơnêi têa ƀă tâi tâng khu kăn tơnêi têa kô pêi pro klêi tơniăn hnoăng cheăng pơcháu.