Hâi lơ 30/12, a Hà Nội, Hok viê̆n Chĭn trĭ Kuô̆k ya Hồ Chí Minh tơkŭm po Hneăng hôp mơgêi tơdroăng pêi cheăng hơnăm 2025 ƀă pêi pro hnoăng cheăng hơnăm 2026. Pôa Tô Lâm, Kăn xiâm pơkuâ hnê ngăn Đảng veăng ƀă xông tơpui hnê mơhno. Vêh tối rơkong pơchân dêi Pôa Hồ Chí Minh: ‘’Hnê pơtâp kăn ƀô̆ cho tơdroăng xiâm dêi Đảng’’, Kăn xiâm pơkuâ hnê ngăn Đảng mơnhên, Hok viê̆n cho tíu tơdjêp tuăn ngôa rơkê, khên tơnôu kal kí ƀă ki lĕm lĭ luâ̆n dêi Đảng pin, Tíu xiâm hriăn plĕng tơpui leăng kal kí ối má môi dêi tơnêi têa; cho tíu ki má môi loi tơngah tung tơdroăng hnê mơjiâng, hnê tơ’nôm kăn ƀô̆, ki má lối cho kăn ƀô̆ râ ton xŏn.

Tung pơla tâi tâng Đảng, tâi tâng kuăn pơlê, tâi tâng lêng pin dế tơmiât pêi pro troh Hneăng hôp má XIV ƀă tơdroăng ki pói vâ po môi hneăng mơnhông nếo, Kăn xiâm pơkuâ hnê ngăn Đảng pơkâ thế, tung la ngiâ Hok viê̆n Chĭn trĭ Kuô̆k ya Hồ Chí Minh tơkŭm pêi pro 6 mơnhên prôk la ngiâ ƀă hnoăng cheăng ki xiâm, pơtối pơhlêh nếo xiâm tơdroăng hnê mơjiâng, hnê tơ’nôm kăn ƀô̆ tiô troăng ki pơxúa, châ tơƀrê, tiô rơxông nếo, tơrŭm krá ƀă pơkâ tơkŭm po pêi pro mâu pơkâ troăng pêi cheăng ton xŏn dêi Đảng.