Khĕn kơdeăn hnoăng veăng ‘no ki kal dêi Khu kăn tung hneăng 2021-2026, malối tung mơgêi 40 hơnăm hơ’lêh nếo, chêh Hlá mơ-éa pơtroh ăm hneăng hôp má 14, pôa Tô Lâm tối, Hô̆i đong hiăng hơ’lêh nếo tơdroăng cheăng, tơmâng khât tơdroăng cheăng kal kí, pêi cheăng tơdroăng kân hlối, tơdroăng cheăng pá, kal tơdrêng, pêi teăm Khu kăn Tíu xiâm, Khu xiâm Kal kí, Khu hnê ngăn Đảng.

Klêi mê tối nhên, tơdroăng tơpui leăng ai tơdroăng cheăng pêi kal tung mơnhông cheăng kăch măng, Kăn xiâm pơkuâ hnê ngăn Đảng, Kăn xiâm hnê ngăn tơnêi têa pâ thế, Hô̆i đong kal tăng ‘nâi plĕng trâu tâ ‘na troăng hơlâ, túa pêi ƀă troăng prôk tiô chuh ngiah xah hô̆i a Việt Nam tung pơ’lêh rơxông pơkuâ cheăng tiô túa nếo. Thế hbrâ rơnáu tâ, rơkê ƀeăn tâ, trâu rơdâ a mâu tơdroăng ki kal, tơdrăng a mâu tíu ki pá, tíu ki ối pá vâ mơnhông, ing tơbrê, ing mê hnê teăm tơdrêng, tơƀrê a mâu hlá mơ-éa chêh dêi Đảng.

Rôh kố, pôa Tô Lâm xuân pơkâ thế, mâu khu, cheăng khu xiâm, kơvâ cheăng, kong pơlê pơtối tơmâng khât tâ, pro hlâu vâ Khu hnê ngăn tơdroăng tơpui leăng pê klêi hnoăng cheăng; ngăn tơdroăng mơgêi pêi pro, ăm ‘nâi mâu tơdroăng, tơrŭm tăng ‘nâi plĕng tơdroăng tơpui leăng cho hnoăng cheăng kal kí dêi tơná, veăng mơ jiâng xiâm tơpui leăng dêi kăch măng Việt Nam nôkố, túa lĕm tro tung chal mơnhông nếo.