Hneăng lăm pôu dêi Kăn xiâm pơkuâ kong têa Brazil ai pơxúa kân khât, pro xiâm ki mơdêk tâ nếo mâu rôh tơrŭm cheăng pơla péa tơnêi têa tung tơrŭm cheăng pơla Việt Nam - Brazil. Hneăng lăm pôu dêi pôa Lula da Silva ƀă mâu kăn xiâm ƀă hên khu mơdró dêi Brazil troh Việt Nam rôh kố cho vâ mơhno ăm hlo ki mơ-eăm kal kí, ki kal dêi tơrŭm cheăng pơla péa pâ xuân mơhno Việt Nam cho tơnêi têa tơrŭm ki nhoăm dêi Brazil.

Hneăng lăm pôu cho rôh pêi tơdroăng kal tơrŭm pơla péa pâ, po rơdâ tơpui tơno tơrŭm cheăng tung hên kơvâ ki kal, mơdêk tơrŭm a mâu hneăng hôp hên troăng. Tung hneăng lăm pôu râ kăn xiâm Tơnêi têa troh Việt Nam, pôa Lula da Silva, Kăn xiâm pơkuâ kong têa veăng leh tơdah hlối tơpui tơno ƀă pôa Lương Cường, Kăn xiâm hnê ngăn tơnêi tea, trâm mâu kăn Đảng, Tơnêi têa Việt Nam xuân môi tiah ai mâu tơdroăng cheăng ki kal a Hà Nội.