A cheăm Tây Khánh Sơn, peăng kong ngo ai hên kơdrâm kuăn pơlê hdrông kuăn ngo, nôkố bu ai 135 ngế thái cô, ối kal 30 ngế thái cô nếo. Ai mâu môn hriâm môi tiah Ngoại ngữ, Âm nhạc, Tin học ƀă hên mâu môn ki ê ôh tá ai thái cô troh a lâm vâ hnê, chiâng kơnôm mâu thái cô sap ing cheăm ki ê lăm gum hnê. Pôa Phạm Ngọc Hải, Kăn pơkuâ hnê ngăn Đảng ủi cheăm Tây Khánh Sơn ăm ‘nâi, cheăm hiăng tơkŭm po rah xo thái cô la ôh tá ai kơbố nâp hồ sơ.

"Cheăm Tây Khánh Sơn ai 5 toăng hngêi trung dế ối kal 30 ngế thái cô. Ngin tối tơbleăng, mơhnhôk tơdroăng ki rah xo thái cô hnê tung mâu loa rơ’jiu vâ kĭ tơkêa. Môi tiah ôh tá ai thái cô ki lâi vâ lăm troh a kong ngo, mê ôh tá ai thái cô ki lâi ôh ti vâ. Cheăm ngin rơhêng vâ kong pơlê tŏng gum ƀă túa ki xing xoăng pơtroh thái cô lăm troh a kong ngo pêi cheăng hnê akố”.

Tơdroăng kố ôh tá xê trâm hlo to a Tây Khánh Sơn mê ối trâm hlo a hên cheăm a kong ngo ki ê dêi Khánh Hòa môi tiah a Khánh Vĩnh, Bác Ái ƀă hên cheăm ki ê. Hdrối nah, tơdroăng ki ối kal thái cô hnê a peăng kong châ mâu tơring tung kong pơlê xing xoăng pơtroh đi đo. Laga, sap ing pêi cheăng tiô túa kăn pơkuâ péa râ, troăng hơlâ pơtroh ngế pêi cheăng hnê tá hâi châ vêh po. Tiô pôa Lê Đình Thuần, Phŏ pơkuâ Khu ngăn Hnê hriâm ƀă Hnê mơnhông tuăn ngoâ rơkê kong pơlê Khánh Hòa kố cho ƀai toăn ki pá tá hâi ai rơkong tiâ mơnhên tơdrăng:

“Ngin kô pơtối hriăn plĕng tơ’nôm ai mâu troăng hơlâ pêi pro ki tơƀrê, krếo thế mâu thái cô lăm troh hnê a kơpong malối xơpá. Tâng pơtroh môi tơdroăng Pơkâ athế ai troăng prôk, pâ troăng hơlâ pơkâ pêi, môi tuăn ƀă troăng hơlâ, chêh pro tơdroăng pơkâ, xo kơlo liăn hrê, kơlo pơkâ hrê, hên troăng ôh tá tơ’lêi hlâu klâi ôh”.

Hlo tơdroăng ki ai khât kố a mâu hngêi trung a kong ngo ki ối kal thái cô mê Khu ngăn ‘na Hnê hriâm ƀă Hnê mơjiâng tuăn ngoâ rơkê kong pơlê Khánh Hòa mê kal hâi khế hriăn plĕng, Kăn pơkuâ hnê ngăn Tĭnh ủi Khánh Hòa cho pôa Trần Phong pơkâ thế rĕng séa ngăn túa pêi sap kong pơlê tung lâp tơnêi têa, hdrối vâ hriăn plĕng – pơkâ mơ’no troăng hơlâ.

“Tung lâp tơnêi têa ôh tá ai xếo mê drêng mê ah tơná pin nếo hriăn plĕng troăng hơlâ. Nôkố, mâu kong pơlê ki ê ai mê pin ngăn, hriâm ƀối. Xua troăng hơlâ kố gá ngăn tung liăn ngân dêi kong pơlê, hnoăng pơkuâ xua Hô̆i đong Hnê ngăn kong pơlê pơkâ. Kong pơlê ai liăn ngân mê kô tŏng gum tơdroăng ki kố dêi kong pơlê ƀă mâu thái cô drêng lăm troh a kong ngo pêi cheăng môi tiah lâi?”

Pêi pro ƀai toăn ki ối kal thái cô peăng kong ngo a Khánh Hòa ôh tá xê cho tơdroăng ki rah xo, mê ối cho loăng rêk vê ngăn tơdroăng ki tơmâng ngăn, hnoăng cheăng pôu râng dêi khu pơkuâ tơdroăng kal kí ƀă tơdroăng cheăng hnê hriâm a kơpong kong ngo. Tơdroăng ki mâu hngêi trung peăng kong ngo kal drêng kố cho tơdroăng hbrâ rơnáu, rơkê sap ing mâu kơ koan tí tăng ‘nâi plĕng tung cheăng tơ’mot thái cô. Vâ drêng hơnăm hriâm nếo pơxiâm, mâu hngêi trung kong ngo ôh tá pá puât xếo lăm mung thái cô ing tíu ê.