Peăng xêi lơ 14/7, a Hà Nôi, Khu pơkuâ hnê ngăn Đảng uỷ Kŏng an tơnêi têa tơrŭm cheăng ƀă Khu xiâm séa mơnhên hnoăng cheăng kơxô̆ 893 dêi Khu hnê mơhno cheăng Đảng tơkŭm po Roh hôp pơkâ mâu hnoăng cheăng, Pơkâ tơdroăng séa ngăn cheăng ƀă Khu xiâm hnê mơhno Đảng uỷ Kŏng an tơnêi têa. Pôa Nguyễn Trọng Nghiã, Kăn pơkuâ hnê ngăn Đảng, Ngế xiâm ngăn ‘na hnê mơhno cheăng kal kí tơnêi têa, Kăn xiâm séa ngăn tơdroăng cheăng Đảng hiăng pơkuâ a roh hôp mê.

Xông tơpui a roh hôp, pôa Nguyễn Trọng Nghiã vêh mơnhên tối: Tơdroăng séa mơnhên ngăn cho hnoăng cheăng ki đi đo pêi pro tiô pơkâ rêm hơnăm dêi Khu xiâm ngăn cheăng kal kí, Khu xiâm hnê mơhno cheăng Đảng, vâ ing mê, châ hlo ƀă po rơdâ mâu túa pêi pro ki tro, rơkê plĕng, ki nếo. Tơdrêng amê, hnối tí tăng mơnhên ngăn mâu tơdroăng ki tá hâi teăm pôu râng dêi hnoăng cheăng, kơ koan, tíu pơkuâ cheăng.

Tơdrêng amê, hnối pơkâ thế tung pơla pơkâ pêi hnoăng cheăng, khu kố ƀă mâu khu ki tơrŭm cheăng châ séa mơnhên ngăn tung rak vế, pêi pro mâu tơdroăng cheăng tro tiô pơkâ, rak vế tơniăn tơdroăng cheăng ki tiô khu pú hên, tro tiô tuăn kuăn pơlê pói rơhêng vâ, tơbleăng mơnhên, tơtro, mơhno tối cho tơdroăng ki tơdrăng khât, khu râ pá pêng khu râ pá kơdâm pơrá môi tuăn dêi pó pêi pro hnoăng cheăng tơdjuôm.