Khu kăn pơkuâ 2 râ a Lâm Đồng pêi cheăng châ tơƀrê
Thứ hai, 05:00, 21/07/2025 Tơplôu: Nhat Lisa/VOV Tây Nguyên Tơplôu: Nhat Lisa/VOV Tây Nguyên
VOV.Xơ Đăng - Ing tơdroăng pơkuâ hnê ngăn rĕng, khŏm mơ-eăm, mê kong pơlê Lâm Đồng hiăng rĕng lêi tah lôi mâu tơdroăng ki ối tơvâ tơvân tung pơkuâ ngăn tơdroăng cheăng 2 râ ƀă ối má 7 tung lâp tơnêi têa ‘na chêh bro kêi rĕng mâu túa hlá mơ-éa ăm kuăn pơlê.

Mâu hâi pơla hdrối mê hía nah, mâu Tíu xiâm ki chêh bro hlá  mơ-éa a kong pơlê Lâm Đồng hiăng tơdah xo lối chât rơpâu hô sơ, ƀă hiăng tơleăng mơnhên châ lối 97%, ối má 7 tung lâp tơnêi têa ‘na chêh bro hlá mơ-éa ăm kuăn pơlê. Vâ kuăn pơlê pơtối châ rĕng pêi pro klêi dêi hnoăng cheăng ki tro tơdroăng, ai pơxúa, Vi ƀan hnê ngăn kong pơlê Lâm Đồng hiăng tơkŭm hnê hriâm, hnê mơhno ăm lối 5 rơpâu ngế kăn ƀô̆ ki pêi cheăng a mâu tíu xiâm ki chêh bro hlá mơ-éa a râ cheăm; tŏng gum rĕng ‘na tơdroăng ki kreăng, tơvâ tơvân ‘na hô sơ ki ai tơdjâk troh tơnêi tíu xua ta hâi ai tăm pŏng ki vâ mơnhên; tah lôi mâu tơdroăng ki xahpá ‘na troăng hyôh phon, hlá mơ-éa; mơjiâng pro 3 Tôh cheăng dêi kong pơơlê ki pêi cheăng, tŏng gum mâu chewm ki ối tơvâ tơvân, tro kreăng, pơkâ mơ’no pêi pro mâu tơdroăng ki xiâm ƀă hên mâu tơdroăng ki ê. Pôa Hồ Văn Mười, Kăn hnê ngăn Vi ƀan kong pơlê Lâm Đồng tối ăm ngin ‘nâi, kong pơlê dế pơtối pêi pro lĕm tro hnoăng cheăng kăn ƀô̆ vâ ‘mâi rơnêu khu pơkuâ cheăng 2 râ pêi cheăng châ ai pơxúa, tơƀrê khât:

  “Tơ’lêi hlâu mê xua ki ‘nâi nhên mê cho, kăn ƀô̆ châ hlê  plĕng nhên ‘na tơdroăng pơkuâ ngăn khu cheăng kuăn pơlê, cho ai 2 râ, mê cho râ kong pơlê ki kân, pơkâ hnê thế râ pá kơdâm, cho râ cheăm, bêng, kơpong, hnoăng cheăng ki mê ga hiăng nhên, pôu râng hnoăng cheăng xua mê athế tơkâ luâ hên mâu tơdroăng ki xahpá. Ngin troh akố vâ pơtối pêi ‘na hnoăng cheăng kăn ƀô̆. Pơtih bêng ai 2 troh a 3 ngế cho mơngế ki rơkê ‘na khoa hok kŏng ngê̆, laga, ai bêng ki ‘nâ ôh tá ai. Ai bêng ‘nâ dế nôkố kăn ƀô̆ hnê ngăn ‘na Luât ôh tá ai ngế ki lâi pêi troh pêi cheăng, xuân ai bêng ki ‘nâ ai mơngế kăn ƀô̆ cheăng ngăn ‘na Luât la ôh tá rơkê, tá hâi plĕng. Klêi mê, mâu tơdroăng ki trâu hơngế ‘na tơnêi tíu, tiô kơ ing hiâm mơno ki mê kô vêh tăng rah mâu kăn ƀô̆ ti lâi ăm ga i tơdâng vâ troh pêi cheăng a 124 to cheăm, bêng, kơpong”.

Tơdrêng ƀă lối 5.000 ngế kăn ƀô̆ ki pêi cheăng a mâu tíu xiâm ki ngăn ‘na tơdroăng cheăng râ cheăm, mê kong pơlê Lâm Đồng hiăng mơhnhôk 1 rơpâu 200 ngế đoân viên droh rơtăm troh a 124 to cheăm, bêng, kơpong tung lâp kong pơlê vâ tŏng gum khu râ kăn pơkuâ hnê ngăn pêi hnoăng cheăng ki chêh bro hlá mơ-éa ƀă pêi tơdroăng cheăng xúa kơxô̆. Vâi rơtăm ki mơhnŏng pleăng dêi tơdroăng cheăng hnê ăm vâi krâ-nhŏng o tiê tro tiô tơdroăng, tâ định danh điện tử, chêh bro tài khoản kuăn pơlê ƀă điê̆n tưh ƀă hên mâu tơdroăng ki ê. Tơdrêng amê, hnê mơhno tối, tơbleăng mơnhên ƀă tŏng gum mâu tơdroăng ki kal má môi ‘na mâu túa hlá mơ-éa, ‘na tơdroăng ki ai tơdjâk troh măng internet.

Tiô pôa Bùi Quốc Huân, Kăn hnê ngăn Vi ƀan cheăm Lạc  Dương, kong pơlê Lâm Đồng tối, kố cho tơdroăng cheăng pêi ki ai pơxúa kân khât, veăng gum thăm mơdêk tơdroăng cheăng xiâm ki vâ tŏng gum chêh bro hlá mơ-éa, châ pêi pro tơ’lêi hlâu, kơdroh hâi khế, chôu phut tung pơla tơdah xo ƀă tŏng gum, chêh bro hô sơ, maluâ ƀă mâu kơpong ki ối hơngế hơngo, pơlê cheăm dêi hdroâng mơngế kuăn ngo ki ối trâm hên xahpá tung xúa kŏng ngê̆ kơxô̆ a phôn smartphone. Pôa Bùi Quốc Huân tối ăm ngin ‘nâi:

“Drêng kuăn pơlê lăm troh chêh bro hlá mơ-éa, tung pơla pêi pro mâu tơdroăng cheăng điê̆n tưh kố, xua vâi krâ-nhŏng o ta hâi hmâ, kơnôm ai khu vâi droh rơtăm ki rơkê kố tŏng veăng. Á xuân hiăng hnê tối ăm khu kŏng an cheăm tơrŭm cheăng ƀă kuăn pơlê pro ti lâi, gum hnê kuăn pơlê rĕng hlê má môi, rĕng má môi, ngế ki lâi tá hâi teăm ai kĭch hoăt VneID mê athế hnê tối, pro ăm kơ vâi i rơhí rơhó, i nhên, i tŭm tâi tâng. Tơdrêng amê, vêh mơnhên kơxô̆ kuăn pơlê ki xúa smartpơhone vâ ing mê, vâ ai troăng hơlâ tŏng gum. Ki kal má môi mê drêng ai kuăn pơlê troh chêh bro hlá mơ-éa mê athế rĕng gum pêi pro ăm kơ vâi tơdrêng hlối”.

Tơplôu: Nhat Lisa/VOV Tây Nguyên

Viết bình luận

TIN CÙNG CHUYÊN MỤC

Video

Bi mni kơ Awa Hô
Đơs git oh, git bi
06/05/2025
Jreng Jrong
30/03/2024
Tanh bĕ dra hiam
22/03/2024