Tung kơmăng mơ’nui hơnăm kong hngíu, tung toăng hngêi hiăng châ mô đô̆i gum rơnêu pro lĕm, hơtô, jâ Trần Thị Ba, ối a thôn Phú Hậu, cheăm Suối Hiệp, kong pơlê Khánh Hòa vêh pâ vế a kơmăng môi tiah kố, dêi lối 1 khế hdrối, têa lu tâk rĕng, kuăn pơlê lâp kơtâu trâm tơdroăng ‘’trâm pá kân’’. Drêng trâm pá puât kân, mâu ngế mô đô̆i hiăng teăm troh tơdrêng veăng gum, tŏng gum kuăn pơlê châ rêh tơniăn:

‘’Á tơngah xêh kô hlâ tâi. Têa lân lu rĕng ‘nâng tá chói hlo. A xâu ‘nâng, mâu tăm mô đô̆i troh mê á phiu ro ‘nâng. Á prôk lăm ôh tá chiâng, kơnôm mâu tăm pôu.’’

A công trương dêi tơdroăng ‘’Cheăng pêi Quang Trung’’ vêh mơjiâng kơpong têa lân lu Khánh Hòa hâi kố, ai tơdroăng ki kơhnâ dêi mơngế lêng Khu lêng a têa kơxĭ kơpong 4. Khu mô đô̆i xo gât, tông prêi xơmong mơjiâng pro hngêi kum kuăn pơlê tung mâu hơnăm hiăng vâ tâi, têt hiăng vâ troh kố, xuân cho khu mô đô̆i ki ƀeăn ƀĕng rơkê má môi, hiăng to mau plong tơkâ têa lân lu kơtăn kố 3 măng tĭng, tơbriât tơdroăng ki rêh ăm kuăn pơlê.

Chuẩn Đô đốc Nguyễn Anh Tuấn, Kăn pơkuâ lêng kơpong 4 Khu lêng gâk kring têa kơxĭ tối ăm ‘nâi: kơmăng lơ 19/11, klêi kơ’nâi tơdah pơkâ, Khu pơkuâ lêng kơpong hiăng pơkâ lo lăm gum kuăn pơlê drêng kong mêi kân, têa lân lu ó ôh tá chiâng vâ prôk lăm a dêi pó, khu mô đô̆i hiăng ai mâu a mâu tíu ki lân lu trâu. Tung môi pơla, lối 5.000 roh kăn ƀô̆, mâu lêng rơtế 100 plong tuk châ pơtroh, tơdroăng tŏng gum, xĕn 5.400 ngế kuăn pơlê to a tíu tơniăn, tung mê ai 6 ngế kuăn ngá ƀă 1 ngế kơdrâi hiăng vâ mơhum. Chuẩn Đô đốc Nguyễn Anh Tuấn tối:

‘’Drêng Kăn pơkuâ hnê ngăn Đảng pơkâ cho 8 chôu kơmăng ngin kô lo pêi cheăng, 9 chôu hiăng ai mâ a kơpong Diên Khánh. Ngin mot mâu kơpong ki trâu má môi dêi pơlê, cheăm, mâu tíu ki mê ôh tá chiâng vâ mot. Pơkâ hnê mơhno kơtăng thế tơdrêng prôk lăm ƀă mô đô̆i. Tung đông ai ki klâi, mơ’no tâi tâng vâ tŏng gum kuăn pơlê.’’

Tơdroăng pơkuâ tơdrêng tiô ngăn kơpong, prôk lăm rơtế mô đô̆i gum mâu troăng tŏng gum châ pơhlêh tơtro, teăm tơdrêng, kơdroh iâ má môi ‘na trâm xía vâ ‘na mơngế drêng kong mêi têa lân lu râ ó tiô tối hdrối. Hiâm mơno thế đi đo tơmiât ‘’tŏng gum kuăn pơlê hdrối, tơbleăng kơ’nâi’’. Tung péa hâi lơ 20 ƀă 21/11, mô đô̆i xo tơmeăm tung hnôu 3 tâ̆n kế kâ, pơtroh ăm kơmăi chuâ têa kruá vâ xing xoăng têa kruá ăm kuăn pơlê kơpong ki lân lu. Drêng têa xiâ, mô đô̆i pơtối mơgrúa kong prâi, chiâng ăm prôk lăm a troăng kân, tŏng gum vêh mơjiâng pro hngêi, hngêi trung. Thiê̆u tă Nguyễn Công Trứ, Khu pơkuâ lêng, Hngêi trung Sih quan Không quân tối ăm ‘nâi:

‘’Mô đô̆i mơgrúa hngêi kuăn pơlê, hngêi trung hriâm lâm hriâm vâ mâu muăn troh hngêi trung. Troh nôkố, sôk a troăng kân cho hên mê thế xúa rơxế kơmăi kơmok pêi tâng ivá mơngế ôh tá kâi vâ pêi. Mê cho rơxế gu, rơxế po, rơxế kân ƀă hía hé, rế mơgrúa kong prâi rế mơgrúa troăng kân ăm kuăn pơlê prôk lăm tơ’lêi hlâu.’’

Ôh tá xê to tŏng gum a ngiâ, khu mô đô̆i kong pơlê Khánh Hòa ối hbrâ tơbleăng mâu tơdroăng tơkêa bro khu ki pêi hbrâ, ví kong prâi pro ôh tá tơniăn; tơrŭm hnê mơhno, hnê pơtâp troăng gum, ƀă pơkâ vêh mơjiâng krá tơniăn klêi kơ’nâi kong prâi pro ôh tá tơniăn. Khu xiâm pơkuâ mô đô̆i kong pơlê hiăng rơtế ƀă mâu đông lêng dêi Khu xiâm pơkuâ mô đô̆i, lâp kong pơlê hiăng mơhnhôk vâ chê 16.000 kăn ƀô̆, mô đô̆i, 283 toăng plong tuk, tơkŭm xĕn 118.000 ngế kuăn pơlê troh tíu tơniăn. Đăi tă Nguyễn Túy, Kăn pơkuâ Khu xiâm pơkuâ Mô đô̆i kong pơlê Khánh Hòa tối rơdêi:

‘’Thế mot pêi cheăng inhên rêm kơpong, xing xoăng khu, plong tuk tơtro rêm tíu. Plong, ca nô tŭm túa mot a kơpong ki lâi tơ’lêi hlâu. Tơkŭm tŏng gum mơngế hdrối, kơ’nâi mê nếo gum kế kâ, kơchâi kâ, têa krúa ăm kuăn pơlê drêng têa hiăng lân tâi tâng.’’

Roh kong mêi têa kân lân lu pơla kố nah pro tro lŭp râ ó a kong pơlê Khánh Hòa, ƀă 22 ngế hlâ, 20 ngế tro rong; 89 toăng hngêi tro tơhnâp tâi tâng, 290 toăng hngêi tro tơ’nhê. Hdrối mâu tơdroăng ki mê, Kăn pơkuâ hnê ngăn cheăng Đảng kong pơlê Khánh Hòa pơkâ mâu râ, mâu kơvâ pêi pro kơtăng 5 ‘’thế’’ ƀă troăng pêi ‘’4 tơdrêng’’, tơdrêng amê tơniăn gum rêh ối pơlê pơla, pro tơniăn pêt mơjiâng tơmeăm khoăng, kơjo mơngế ăm hbrâ ví kong prâi pro ôh á tơniăn. Mơnhên hnoăng dêi khu mô đô̆i, pôa Nghiêm Xuân Thành, Kăn pơkuâ hnê ngăn cheăng Đảng kong pơlê Khánh Hòa mơnhên tối:

‘’Khu mô đô̆i, khu kŏng an hiăng tŏng gum, pơtroh hên kăn ƀô̆, mâu lêng, hên plong, tuk tơdâng tơ’mô; păng ‘nâng cho khu ki xiâm tung tŏng gum kuăn pơlê xuân môi tiah khu ki xiâm tung rơnêu kế tơmeăm  khoăng drêng kong mêi têa kân lân lu tung pơla kố nah.’’

Păng ‘nâng a Khánh Hòa ăm hlo, mơhé trâm hên tơdroăng pá puât ki lâi, mô đô̆i đi đo cho tíu hgiân krá kuăn pơlê, cho khu ki djâ troăng ahdrối, khu ki xiâm tung rak vế châ chăn, tơmeăm khoăng ƀă vêh mơjiâng tơdroăng rêh ối klêi kơ’nâi kong prâi pro ôh tá tơniăn.