Kơxê lơ 28/12, a cheăm Ia Dom, kong pơlê Gia Lai, Ƀinh đoân 15 (Khu xiâm pơkuâ lêng) tơkŭm po Leh pơxiâm mơjiâng pro Kuât khôi túa lĕm tro cheăm Ia Dom. Kố cho tơmeăm po apoăng tung tơdroăng mơjiâng 9 to kuât khôi túa lĕm tro diâp ăm kuăn pơlê mâu cheăm tơkăng kong peăng mâ hâi Luô dêi péa kong pơlê Gia Lai ƀă Quảng Ngãi.

Tiô pơkâ pêi, 9 to kuât khôi túa lĕm tro châ mơ’no liăn mơjiâng pro ƀă tâi tâng kơxô̆ liăn 20 rơtal liăn. Rêm tơmeăm ai ƀăng deăng dâng 130 met karê, xŏn lối 17 met.

Mâu kuât châ mơjiâng pro tiô khôi vâi krâ nah, rế tơtro ƀă khôi túa lĕm tro dêi kuăn pơlê mâu hdroâng kuăn ngo kơpong tơkăng kong Gia Lai ƀă Quảng Ngãi.

Tiô tối hdrối, tâi tâng 9 tơmeăm kô kêi đeăng ƀă djâ ăm xúa tung khế 9/2026. Xông tơpui a leh pơxiâm mơjiâng pro, Thươ̆ng tươ̆ng Trương Thiên Tô, kăn pơkuâ Kơ koan xiâm Kal kí Khu mô đô̆i Kuăn pơlê Việt Nam tối ăm ‘nâi: tơdroăng mơ’no liăn mơjiâng kuât khôi túa lĕm tro a mâu cheăm tơkăng kong Tây Nguyên mơhno tơdroăng tơmâng dêi Đảng, Tơnêi têa ƀă Mô đô̆i ƀă kuăn pơlê hdroâng kuăn ngo, vâ pro krá khu tơrŭm môi tuăn tâi tâng kuăn pơlê, mơjiâng krá ‘’hiâm mơno kuăn pơlê krá chân”, ƀă hnoăng rak krá tơniăn kal kí, gâk kring tơnêi têa - gâk kring tơniăn tung pơlê.