Tiô tơbleăng, kong pơlê Dak Lak hiăng pêi kêi đeăng châ tơƀrê tơdroăng tơpui tơno kal kí má môi, môi tuăn tơbleăng 28 ngế ki tơbriât pro kăn teăng mâ Kuô̆k hô̆i hneăng má XVI a kong pơlê vâ rah xo 15 kăn teăng mâ; tơbleăng 148 ngế tơbriât to pro kăn teăng mâ Hô̆i đong kong pơlê vâ rah xo 84 kăn teăng mâ, tơbleăng lối 4.300 ngế vâ rah xo 2.445 kăn teăng mâ Hô̆i đong râ cheăm.

Klêi kơ’nâi hôp tơno kal kí, kong pơlê pơtối pêi pro tơdroăng pơhlêh rah xo, mơngế ki vâ rah xo ƀă kơxô̆ mơngế châ tơbleăng tơbriât vâ rah xo tiô pơkâ, tơniăn tiô tơdroăng ki teăng mâ, kuăn pơlê pơkuâ dêi hnoăng ƀă hnoăng rah xo rơdâ dêi kuăn pơlê. Vâ tơniăn kring tơniăn kal kí, ối tơniăn lâp pơlê pơla, mâu khu cheăng hiăng mơjiâng pơkâ pêi ƀă troăng pêi inhên, tơrŭm krá tơniăn; tơdroăng tơdah hô sơ rah xo ƀă mâu tơdroăng ki tơdjâk, tơkŭm po tơniăn, tro tiô pơkâ.

Khu séa ngăn mơnhên, kheăn kơdeăn tơdroăng ki hbrâ, pôu râng hnoăng cheăng dêi Vi ƀan tâ phĭu kong pơlê Dak Lak; pơkâ kong pơlê pơtối thăm gâk kring kal kí tung khu, pêi kêi đeăng mâu troăng kring tơniăn a mâu tíu tâ phĭu; mơdêk pơtâng tối vâ kuăn pơlê ‘nâi nhên tơdroăng ‘na mơngế ki châ rah xo, pêi pro hnoăng rah xo ki rơkê plâ drêng tâ phĭu.