Klăng 8 chôu kơxo hâi lơ 18/7, Khu xiâm ngăn hnê hriâm ƀă hnê mơjiâng tuăn ngôa rơkê hiăng tơbleăng điêm tơ’noăng mơgêi hriâm râ má pái phôh thong hơnăm 2023 dêi lối 1 rơtuh ngế hok tro tơ’noăng. Mâu trang web tí tăng ngăn điêm hên ngế po ngăn. Hơnăm kố, Khu xiâm ngăn hnê hriâm ƀă hnê mơjiâng tuăn ngôa rơkê pơkâ Khu xiâm ƀă mâu Tíu xiâm ngăn hnê hriâm ƀă hnê mơjiâng tuăn ngôa rơkê, mâu tíu chêh hlá tơbeăng điê̆n tưh rơtế tơbleăng điêm tơ’noăng a 8 chôu kơxo mê tơdroăng séa ngăn điêm dêi hok tro tơ’lêi tâ, mâu hok tro ôh tá êa hrăng plâ măng tơkôm sap 0 chôu vâ ngăn điêm môi tiah hơnăm nah.

Tiô tơdroăng ăm ‘nâi mơnhên điêm tơ’noăng dêi khu xiâm ngăn hnê hriâm ƀă hnê mơjiâng tuăn ngôa rơkê, môn Giáo dục công dân ai điêm trung bình hên má môi, cho 8,29 điêm, tung mê, điêm ki ai hên hok tro châ 9 điêm. Môn tơ’noăng kố xuân ai kơxô̆ hok tro châ 10 điêm hên má môi. Môn ai điêm tơ’noăng trung bình hên má 2 dêi hneăng tơ’noăng kố cho Ngữ văn, la bú ai 1 ngế hok tro châ 10 điêm.

Mâu môn Tóan, Vật lý, Hóa học, Sinh học, Lịch sử,  Điạ lý ai điêm trung bình a kơlo sap 6,3 troh 6,74 điêm, la tâng vâ pơchông ƀă hơnăm nah, kơlo điêm ki trung bình ƀă kơxô̆ ƀai tơ’noăng châ 10 xuân kơdroh. Môn nâl Ănglê ai điêm tơ’noăng trung bình iâ má môi mâu môn tơ’noăng, ai 5.54 điêm.  Ai 494 ngế hok tro châ điêm 10  môn tơ’noăng rôh kố.