Tung lâp kong pơlê ai 41 toăng hngêi châ tŏng gum pro nếo, tung mê Kŏng an kong pơlê xo pro 27 toăng ƀă troh tâi hâi lơ 7/1/2026 hiăng pro klêi, pơcháu tâi ăm kuăn pơlê. Tung pơla tơbleăng pro, kăn ƀô̆, Kŏng an kong pơlê hiăng veăng gum lối 33.620 hâi pro, krê khu Kăn sat kơ đô̆ng ƀă khu lêng kring vế tơniăn pơlê cheăm gum lối 1.200 hâi pro, hên kăn ƀô̆, lêng pêi tơ’nôm chôu, pêi ploâ hâi măng, pế hmê kơchâi kâ vâ rak tơniăn klêi pro hngêi.

Pakĭng kơxô̆ liăn xua Khu xiâm ngăn Kŏng an gum, Kŏng an kong pơlê Lâm Đồng ối mơhnhôk veăng tơlo ing pơlê pơla châ lối 622 rơtuh rơtế ƀă hên hmốu, prêi, xơmong, kế kâ. Tơpui a rôh hôp, Thiê̆u tươ̆ng Trương Minh Đương, Kăn hnê ngăn Kŏng an kong pơlê Lâm Đồng tối rơdêi cheăng pêi thâ hiăng klêi tơniăn lĕm, pơtối tơdjâk hiâm mơno “drêng kuăn pơlê kal, rôh kuăn pơlê pá-ai Kŏng an”.