*Kong mê kân mê ton, têa ing kơnhŏng hiu troh a hên cheăm bêng peăng mâ hâi Lâ kong pơlê Gia Lai lân lu, pro tơnêi tơhnah tơhnâp, klêh a troăng ƀă hlối tơdjâk troh cheăng kâ. A cheăm Ia Pa, têa lân a pơlê Mơ Nang 2 ki hdrối nah tro têa pro 300 rơpŏng kuăn pơlê ôh tá châ prôk lăm; kông loăng tơdjêp ƀă Ia Pa prếi Ia Tul tro têa mơhiu. Dâng 7 ha báu klâng ƀă alâi tro têa lân.

A cheăm Ia Hiao, lối 180 ha hdrê pêt tro têa lân, ki hên cho báu klâng, alâi ƀă hên mâu ƀăng tơnêi pêt prá alâi. Mâu cheăm Gào, Ia Krái, Phú Thiện xuân tro têa lân, tơnêi tơhnah tơhnâp a hên troăng prôk, kơpong kĭng têa kroăng têa plông. Kăn pơkuâ cheăm bêng hiăng pơtroh khu ki ‘mâi xĕn kuăn pơlê lo ing tíu rơ-iêo lăm ối a tíu tơniăn.

 *Hlo kong mêi kân, kơxo hâi lơ 9/9, Tíu pơkuâ ngăn ‘na Hyôh kong prâi kong pơlê Dak Lak pơtối tơbleăng kong prâi ôh tá tơniăn râ má 1 ƀă râ má 2, kong mêi kân a mâu tíu, ai tơro, kơblêa, kong mêi príu, mơni têa kô rơlêa ƀă tơnêi tơhnâp. Lối 300 ngế hok tro dêi 10 to lâm a 2 to hngêi trung hriâm cho Hngêi trung râ mă môi Chu Văn An, cheăm Čuôr Dăng, châ pơtê hriâm xua hên troăng tro têa lu, têa ing mâu lô kơxu hiu hlối lân lu, têa hiu têi. Buôn Aring, tíu ai hngêi trung hriâm, đi đo tro têa lu rêm roh kong mêi kân. Mâu kăn cheăm hiăng pâ thế tơkâ luâ xơpá, hlối mơjiâng pơkâ ‘mâi rơnêi pro mâu tíu ki tơnêi hmâ rơhê, meăn pro tíu mơ’no têa lu.