Tơdroăng tơkêa bro troăng kân tơdrăng lĕm Quy Nhơn – Pleiku ki xŏn dâng 125km, yâu 4 toăng rơxế vâ kơtâu tơluâ, tâi tâng kơlo liăn ‘no mơjiâng pro lối 43.700 rơtal liăn ƀă châ klâ 3 tơdroăng tơkêa bro tơrêm tơdroăng. Tung mê, tơdroăng tơkêa bro peăng má 3 ai ki xŏn dâng 35km, ing Km 90 troh Km 124, ƀă tâi tâng kơlo tŏng gum ‘no mơjiâng pro lối 9.100 rơtal liăn. Troăng prôk mê tơkâ luâ 6 to cheăm, bêng mê cho: Lơ Pang, Mang Yang, K’Dang, Đak Đoa, Ia Băng ƀă Hội Phú; tiô tối hdrối kô pro klêi a hơnăm 2029.

Tơbleăng a rôh leh, pôa Phạm Anh Tuấn - Kăn xiâm hnê ngăn Vi ƀan kuăn pơlê kong pơlê Gia Lai ăm ‘nâi, Troăng kân 19 nôkố cho xiâm troăng ki xiâm tơdjêp ƀă Peăng Mâ hâi Lo - Peăng Mâ hâi Lu dêi kong pơlê Gia Lai klêi xing xoăng pro rế lĕm, la xuân ối hên mâu văng rơnâk chong kơ’vŏng kơ ‘vĕng, ki rơdâ troăng kŭn, tơ’lêi trâm xía vâ a troăng prôk, chiâng tíu ki rơ-iô kân ƀă tơdroăng mơnhông cheăng kâ - pơlê pơla dêi kong pơlê.

Drêng hiăng pro klêi, tơdroăng, troăng kân Quy Nhơn – Pleiku ‘nâi tâ, chôu kơtâu iâ, kơdroh tơdế kơxô̆ liăn kơtâu chơ tơmeăm, mơdêk ivá cheăng tơdjêp ƀă kơpong, chiâng troăng ki xiâm dêi Peăng Mâ hâi Lo - Peăng Mâ hâi Lu, tơdjêp ƀă troăng kân tơdrăng Bắc – Nam, plông tơƀai, kông tuk a têa kơxĭ ƀă tíu tê mơdró tơkăng kong Lệ Thanh, ing mê mơhnhôk mơnhông cheăng kâ - rêh ối pơlê pơla ƀă mơnhông tơdroăng rêh ối kuăn pơlê xông tơƀrê.

Kong pơlê Gia Lai pơkâ thế mâu khu ‘no liăn mơjiâng tơmeăm khoăng ƀă khu tơrŭm thế pro lĕm krá troăng vâ tro tiô pơkâ rak tơniăn 5 hơnăm.