A rôh hôp má 10, Hô̆i đong kong pơlê Lâm Đồng hneăng 10 tối, tơdroăng ăm hlá mơ-éa phêp mơjiâng pro hngêi trăng a kuăn pơlê a Đà Lạt ối pro pơhôi; Tơdroăng cheăng rak ngăn tơnêi têa ‘na rak tơniăn tung mơjiâng hngêi trăng a kong pơlê ối hrá. Hên ngế ai xôi ‘na pro tơniăn mơjiâng hngêi trăng ki kân la hâi châ ăm phêp séa ngăn, pơxâu phâk teăm tơdrêng.

Ai ngế ki ‘nâ hiăng châ pơxâu phak la xuân pơtối ai xôi pro kuăn pơlê tô tuăn. Tung mê, rôh tơnêi tơhnâp kĭng troăng, tơhnâp kĭng tíu mơjiâng pro tơmeăm khoăng ki dế mơjiâng, pro 2 ngế hlâ ƀă 5 ngế ki ê tro rong a bêng 10, pơlê kong kơdrâm Đà Lạt a mơ’nui khế 6 kố nah cho vâ pơtih ăm hlo.

Pôa Trần Văn Hiệp, Kăn hnê ngăn Vi ƀan kong pơlê Lâm Đồng tối tiah kố, tơdroăng pơkâ, tơniăn tung mơjiâng tơmeăm khoăng tung kơphô̆ kal thế pơtối châ tơmâng nhên khât. Mâu kăn ƀă mâu kơvâ cheăng thế tơpui tơno ƀă tơbleăng pơkâ tơtro ăm tơrêm kơpong, malối a mâu tíu rơnâk, kĭng a hngêi.

Pôa Trần Văn Hiệp, tối:

“Ngăn ƀă mâ hlo pin hlo xía vâ, ôh tá ‘nâi hdrối, luâ kơ xâu la Đà Lạt xuân ăm hlá mơ-éa phêp mơjiâng. Prôk a troăng Mimosa, Khe Sanh ai 3 troh 4 toăng hngêi xŏn lĕm tung kong ngo, a chêng ngo mê thế séa ngăn nếo, tíu mê ôh tá tơniăn mơni kố ai tơdroăng xía vâ. Ki kal thế xo tơvêh tâi tâng, tá hlá mơ-éa ăm phêp mơjiâng pro. Tơnêi tơhnâp kĭng hdrối kố nah cho ƀai hriâm ăm ‘nâi troh tung mơ-eăm chhá.

Thế ok 5.000 tâ̆n tơnêi, nhân tiô hê̆ sô̆ tâk 8.000 tâ̆n, ƀă tơ’nôm mâu rôh kong mêi mê chiâng ok troăng môi chât to lâi rơpâu tâ̆n... Ai xôi tá troăng prôk ôh tá tơniăn ‘na on tơhrik, tơkéa vâ tối mơjiâng pro pá kong tơkăng kong ki ăm phêp. Pro tơhnâp kĭng mê xoăna ôh tá tiô pơkâ dêi kong pơlê, pro lối 4m, kơtăng pơla mâu kĭng tiah mê xuân ôh tá tro mê chiâng lối ai tơdroăng ki xía vâ’’.

Xuân a Rôh hôp Hô̆i đong kong pơlê Gia Lai hdrối kố nah, mâu kăn hiăng tơkŭm kơ-êng hên tơdroăng ki hên ngế dế kal vâ ‘nâi tung mơjiâng hngêi trăng a kong pơlê. Tung mê, tơdroăng mơjiâng homestay, hngêi kân lĕm hmâng vâ pro kuăn pơlê chiâng hên hôu. Xua hrá klêi mơjiâng pro mâu tơdroăng pơkâ a mâu cheăm tơring  hiăng chiâng tơdroăng pro pá tung tơdroăng tơbleăng mâu tơdroăng tơkêa pro ‘no liăn cheăng.

Pôa Nguyễn Bá Thạch - Ngế pơkuâ Mơjiâng hngêi trăng tơmeăm khoăng Gia Lai tối, tơdroăng cheăng dêi tơnêi têa ‘na rak tung pro tơniăn mơjiâng hngêi trăng tơmeăm khoăng a cheăm tơring pro pơhôi. Hên tơmeăm khoăng mơjiâng pro hmâng vâ drêng hiăng pro klêi nếo ‘nâi, chiâng pro pá tung tơdroăng vâ pơxâu phâk. Tơdroăng ki thế rak vế tro luât dêi kuăn pơlê kơdroh, hên ngế hiăng ‘nâi xôi, ôh tá tro la ối mơhnŏng pro xôi, pro pá, mơdoh hên hâi khế tơleăng mơnhên pơxâu phâk liăn.

‘Na tơdroăng hrá tơbleăng pro mâu pơkâ, chiâng trâm hên tơdroăng xơpá tung rak ngăn pro tơniăn tung mơjiâng hngêi trăng tơmeăm khoăng ƀă tơdjâk troh tơdroăng tối tơbleăng tơdroăng cheăng ‘no liăn pro tơmeăm khoăng, pôa Nguyễn Bá Thạch ăm ‘nâi ki khât: nôkố, kơxô̆ pơkâ xoăng kơpong, pơkâ hdró nhên a kong pơlê nếo pá xôp 30%, iâ tâ dâ dâng tơdjuôm tung lâp tơnêi têa.

“Vâ mâu cheăm tơring, mâu pơkâ hdró  pro ki ôh tá ai xếo, thế séa ngăn vâ tah lôi; xoăng ăm liăn vâ mơjiâng pro pơkâ nhên, tơniăn rêm râ mơjiâng pro tơniăn. Tung pơla hâi ai tŭm kơxô̆ liăn pro ƀă hâi khế vâ pêi ôh tá pơtê tơdroăng pơkâ hdró nhên a cheăm tơring mê mơjiâng pro tơdrêng hdrối luât pơkâ rak ngăn tơdroăng mơjiâng pro tơmeăm khoăng vâ rak ngăn tơniăn lĕm tung mơjiâng pro hngêi trăng tơmeăm khoăng a cheăm tơring tung kong pơlê’’.