Klêi kơ’nâi môi khế tơbleăng pro “Cheăng pêi thâ Quang Trung” rĕng pro, rĕng ‘mêng hngêi ối ăm mâu rơpŏng kuăn pơlê ki ai hngêi tơ’nhiê xua khía mơhot têa kân lân lu pro, troh hâi lơ 29/12/2025 kong pơlê Lâm Đồng hiăng pro klêi 9 toăng hngêi. ‘Na 29 toăng hngêi kal pro nếo ki u ối, nôkố mâu mố đô̆i, kŏng an, kăn pơkuâ ƀă mâu khu pú hên kong pơlê dế tơbleăng tŏng gum kuăn pơlê rĕng pro klêi.

Troh hâi lơ 31/12/2025 kô ai tơ’nôm 4 toăng hngêi nếo châ pro klêi ƀă 25 toăng ki u ối a kong pơlê Lâm Đồng dế pro hiăng vâ klêi hdrối hâi lơ 15/1/2026. Vâ mâu toăng hngêi ki châ pro nếo ƀă mâu hngêi ki ton ăm kuăn pơlê klêi kơ’nâi khía mơhot têa kân lân lu tơ’nôm krá kâk, kong pơlê Lâm Đồng mơhnhôk mâu khu ki tŏng gum kuăn pơlê pêi cheăng veăng gum ăm mâu kế tơmeăm ki kal xúa vâ pro hngêi.

*Troh nôkố, kong pơlê Gia Lai hiăng pêi kêi đeăng mơjiâng 456/674 toăng hngêi, châ 67,66%. Ki nhên, riân troh lơ 28/12, kong pơlê Gia Lai hiăng pêi kêi đeăng rơnêu 27.501/27.522 toăng hngêi tro tơ’nhê, châ kơlo 99,92%. Nôkố u ối 21 toăng hngêi kal rơnêu, dế tung hneăng kêi đeăng má mơ’nui, tiô tối hdrối, kô kêi đeăng hdrối hâi lơ 31/12/2025. Ƀă tơdroăng mơjiâng nếo, kong pơlê Gia Lai hiăng pơxiâm mơjiâng pro tâi tâng 674 toăng hngêi tro tơhnâp, tơ’nhê râ.

Troh nôkố, 456 toăng hngêi hiăng kêi đeăng; 218 toăng hngêi ki ối nếo dê châ tơkŭm pro. Kong pơlê ai pơkâ mơ-eăm pơcháu ăm kuăn pơlê hdrối hâi lơ 25/1/2026. Rơtế ƀă tơdroăng mơhnhôk mơngế pêi cheăng, kong pơlê Gia Lai hiăng mơ’no lối 720 rơtal liăn ing liăn ngân tơnêi têa ƀă mâu kơxô̆ liăn ing pơlê pơla vâ tŏng gum rêh ối pơlê pơla, rơnêu kế tơmeăm khoăng ki tro lŭp ƀă mơjiâng mâu kơpong xĕn ối.