Kơxo hâi lơ 21/5, Vi ƀan kuăn pơlê dêi kong pơlê Lâm Đồng tơkŭm po hôp tối tơdroăng cheăng kâ - pơlê pơla khế 5/2026, tơbleăng tơdroăng kal tung la ngiâ. Hlo hên cheăm, bêng ƀă kơpong ai kơxô̆ liăn ‘no vâ pêi cheăng iâ, Vi ƀan kuăn pơlê kong pơlê Lâm Đồng pơkâ thế mâu cheăm ki mê mơdêk rĕng, mơ-eăm troh hâi lơ 30/6 kô châ xo 40% tung kơxô̆ liăn pơkâ xo. Hơnăm 2026, tâi tâng kơxô̆ liăn ‘no  pro tơmeăm khoăng pơcháu ăm râ cheăm dêi kong pơlê lối 1.320 rơtal liăn.  

Laga troh nôkố nếo xo châ lối 126 rơtal, châ dâng 11%, iâ tâ kơlo pơkâ 18%. Ki vâ tối, xuân ối 10 to cheăm, bêng dêi kơvâ cheăng pơcháu liăn hên la hâi xo. Tiô tối dêi kơvâ khu râ xiâm mê cho tơdroăng hnê mơhno ôh tá kơtăng, ivá chê dêi kăn ƀô̆ ôh ta rơkê, hlá mơ-éa pro ‘no liăn cheăng ối mơdoh mơdon, tơvâ tơvân ‘na vêh liăn chêl thiăn liăn. Pôa Hồ Văn Mười, Kăn hnê ngăn Vi ƀan kuăn pơlê kong pơlê Lâm Đồng pơkâ thế mâu kong pơlê hbrâ tah ki xơpá, ai tơnêi troh dâng lâi kô ‘no liăn pêi cheăng troh dâng mê.