A Hà Nội, kơdrâm kuăn pơlê kong xiâm ƀă tơmối ôm hyô lâp plâi tơnêi troh tíu xiâm pơlê kong kân, rơtâ tá Hngêi khôp Kân, long têa Hồ Hoàn Kiếm... tơdah Pâ Xeăng chu chiâng kuăn mơngế.

Kong prâi a kơmăng Pâ Xeăng chu chiâng kuăn mơngế khăng lĕm ôh tá mêi, ôh tá hngíu, pro tơ’lêi hlâu ăm mâu tơdroăng phiu ro xah hêi, lăm ngăn kong kế dêi kuăn pơlê. Ôh tá xê mâu troăng kơphô̆ tíu xiâm rơtâ tá long têa Hồ Hoàn Kiếm, kơpong a bo hngêi Khôp Kân xuân mơhnhôk kơdrâm tơmối ai mâ sap ing rĕng vâ lăm ngăn, xup um tơbâ.

Tung hngêi khôp, châ rơnuâ bro lĕm ƀă on tơhrik eăng lĕm ƀă ‘măn mâu um ang jơlê, Pâ Xeăng chu chiâng kuăn mơngế, pơtroh tơdroăng pơtâng hnê tối ‘na môi kơmăng khôp pâ tơniăn lĕm, mơhnhôk kơdrâm kuăn pơlê ƀă tơmối troh lăm ngăn, châ hlo.

Tơdroăng hơniâp ro Tĭng kân Noel a Dak Lak hlo a lâp lu, eăng kơnhéa tung hyôh hngíu dêi Tây Nguyên. Mâu troăng prôk troh a hngêi tơring khôp, kơtâu khôp châ rơnuâ lĕm krip. Pakĭng hngêi khôp kân Chính Tòa, mâu tíu ôu kơphế, tíu tê tơmeăm rơnuâ eăng kơnhéa lĕm mơnâ ngăn pro chiâng mâu tíu xup um ki lĕm lih.

Môi rơnó Tĭng kân Noel ki ro, hơtôu, kuăn pơlê khôp Pâ Xeăng rơtế tơmiât troh tung la ngiâ dêi pơlê cheăm rế hía rế mơnhông. Kuăn pơlê châ ngăn, châ hlo rôh tĭng kân Noel a Hngêi khôp Chính Tòa Ban Mê Thuột hơtôu ƀă hên hĭn tơdroăng ki hơ-ui gum.

Kơmăng lơ 24/12, Đà Lạt môi tiah xâp a châ môi to ếo nếo pêng mơngiơk. Tung têa ngêa pro chiâng măng rơmun, on tơhrik eăng lĕm ing mâu hngêi khôp ƀă mâu tơdroăng rơhdruê Pâ Xeăng chu chiâng kuăn mơngế kơdrâm phiu ro lâp mâu kơphô̆, tơbleăng môi rơnó Noel tơniăn lĕm a kơpong pơlê rơpâu reăng. Tíu ki má môi cho kơpong Hngêi khôp Chính tòa Đà Lạt.

Tung dế tíu krip tơdrŏm, loăng hngó Noel kân rơtế rơpâu on pui led eăng bâ, mơhnhôk rơpâu ngế kuăn pơlê ƀă tơmối. Tơdrêng amê, 21 tíu Hngêi khôp a bêng tíu xiâm Xuân Hương – Đà Lạt xuân eăng tung kơmăng leh, chiâng tíu troh khôi túa lĕm ôh tá păng lôi, mơhé kuăn pơlê, tơmối ai tiô khôp lơ ôh. A mâu pơlê, mơngế K’ho xuân kơdrâm tơdah phiu ro tĭng kân, khôp pâ ăm hơnăm nếo tơniăn lĕm, phâi hơtô.