Kơxo lơ 20/7, a tơring Côn Đảo, kong pơlê Bà Rịa Vũng Tàu, Kăn xiâm hnê ngăn tơnêi têa veăng Leh phiu ro hiăng mơjiâng pro klêi Kơno tuk pơto tơmối Côn Đảo ƀă pơxiâm mơjiâng mâu tơmeăm Tíu xiâm khăm pơlât Khu lêng – Kuăn pơlê tơring Côn Đảo. Tơdroăng tơkêa bro ối tung tơmeăm ki xúa khu B, ai tâi tâng kơxô̆ liăn mơ’no 247 rơtal liăn ƀă ai 60 to xoăng koi pơlât, tơdâng hngêi pơkeăng kân khu III, ai kơmăi kơmok khăm pơlât rơxông nếo, khăm pơlât dâi lĕm, tơxâng tơdroăng kal vâ khăm pơlât mâu ngế châi tamo rế hía rế hên ăm kuăn pơlê, khu lêng, tơmối ôm hyô.

A leh hâk ro hiăng mơjiâng pro kêi đeăng Kơno tuk pơto tơmối Côn Đảo, pôa Võ Văn Thưởng, Kăn xiâm hnê ngăn tơnêi têa veăng ƀă pôe ché hâk phiu ro. Tơmeăm ki kơnâ ki kal tung veăng mơnhông mơdró pơto tơmeăm tiô troăng têa kơxĭ, pơto tơmối, tơniăn cheăng lêng gâk kring, ki rơhêng vâ tối cho veăng kum môi iâ pêi pro pơkâ xiâm mơjiâng Côn Đảo chiâng kơpong ôm hyô sinh thái têa kơxĭ ƀă khôi túa lĕm tro – tơdroăng ton nah xông tơtêk – tơdroăng ki loi tĭng, ki má môi, râ kơpong ƀă lâp plâi tơnêi. Kơno tuk pêi cheăng kô kơdroh troăng prôk vâ chê 15 km ing Kơno tuk Bến Đầm vêh a Tíu xiâm Côn Đảo.