Tung chôu phut tơbâ nhoăm pâ hmái hơtĭng, mâu kăn ƀă kuăn pơlê hiăng têk nhang, hlối tu ko hmái hơtĭng tơbâ troh mơhúa mâu ki hlâ ai hnoăng, mâu pâ pôa pin nah dêi kăch măng hiăng hlâ rêh xua vâ rak tơniăn krê, hlâu hlĕng dêi tơnêi êa. Kố xuân cho rôh vâ hnê mâu rơxông nếo ‘nâi pâ nhoăm tơnêi têa dêi kăch măng ăm rơxông nếo hâi kố, thăm pơtô tuăn loi ƀă hnoăng pêi cheăng tung mơjiâng, kring vế Tơnêi têa.

Veăng leh tơbâ, pôa Lê Chí Quyết, Phŏ kăn hnê ngăn Vi ban lêng rak ngăn kong pơlê Dak Lak, cho phŏ kăn hnê ngăn Đảng kong pơlê Dak Lak rơrêk tối, tơdroăng tơkŭm po Leh tơbâ tro rôh hneăng hôp má 14 dêi Đảng dế po thăm pro tơƀrê ki pơxúa pơtối rak vế tơdroăng pêi pro kăch măng, tơbâ tuăn loi dêi kăn ƀô̆, đảng viên ƀă kuăn pơlê a kăn hnê ngăn Đảng.