Dak Lak nôkố ai lối 41.000 ha sầu riêng, tung mê dâng 30.000 ha dế hiăng châ krí, plâi rơnó kố tiô riân châ dâng 500.000 tâ̆n. Laga, tung lâp kong pơlê Dak Lak nếo ai 280 to mah kơxô̆ kơpong pêt ƀă dâng 7.500 ha, ƀă 42 mah kơxô̆ tíu ki tâ tung kơthung châ peăng Sinuâ kĭ. Nôkố ối 165 mah kơxô̆ kơpong pêt ƀă 66 mah kơxô̆ tíu ki tâ plâi tung kơthung hiăng chêh pro klêi hồ sơ la xuân dế tơkôm Khu xiâm ngăn kăng kong Sinuâ (GACC) séa ngăn.

Tiô Vi ƀan hnê ngăn kong pơlê Dak Lak, drêng tâi tâng kơxô̆ hồ sơ kố châ kĭ pơkâ mê ƀăng tơnêi châ hbru ăm mah kơxô̆ kơpong pêt bu châ pêi pro châ dâng 40% ƀăng tơnêi dế tung pơla krí plâi. Tơdroăng mê môi tiah ƀă 295.000 tâ̆n sầu riêng xuân ối châ pro pá kân ‘na kơchô roê.

Rơtế ƀă Dak Lak, mâu kong pơlê Gia Lai, Lâm Đồng, Quảng Ngãi xuân tối tơbleăng hên xơpá drêng tơbleăng pro Pơkâ 38 na mah kơxô̆ kơpong pet sầu riêng ƀă tíu ki tâ plâi sầu riêng tung kơthung. Mâu kong pơlê pâ thế rĕng ai troăng hơlâ môi tuăn ‘na troăng hơlâ pơkâ ăm hnoăng vâ tê ngi kong têa ê, hlối chêh pro klêi tíu ki ‘măn ‘noăng chư chêh klêi kơ’nâi pơkâ châ xêt khât.

Pôa Nguyễn Hoàng Hiệp, phŏ ngế xiâm ngăn chiâk deăng ƀă Hyôh kong prâi ăm ‘nâi, Khu xiâm dế hriăn ngăn vâ ‘mâi rơnêu Pơkâ 38 tiô hnê mơhno dêi Ngế pro xiâm hnê ngăn Chin phuh tiô troăng ki rơkê tâ; tơdrêng amê hlối pơhlêh tâi tâng túa pơkâ ki hbru ăm mah kơxô̆ kơpong pêt ƀă tíu ki tâ tung kơthung, pơhlêh rơdêi sap ing séa ngăn vâ kơdroh iâ mâu hlá mơéa chêh pro ăm kuăn pơlê ƀă khu mơdró kâ.

Ƀă rơnó krí plâi sầu riêng hơnăm kố, Khu xiâm ngăn chiâk deăng ƀă Hyôh kong prâi kô tơrŭm ƀă mâu khu xiâm, kơvâ cheăng ƀă Sinuâ vâ hnan thế mơdêk rĕng tơdroăng ki hbru ăm mah kơxô̆ kơpong pêt ƀă tíu tâ tung kơthung; tơdrêng a mê hlối mơhnhôk thế pro plâi sầu riêng hngíu. Laga, troăng hơlâ pêi pro mê vâ kơvâ plâi sầu riêng mơnhông krá tơniăn ton cho tơdroăng ki loi tơngah dêi kơchô tê mơdró ƀă hnoăng cheăng pôu râng. Pôa Nguyễn Hoàng Hiệp tối nhên:

"Rơhêng vâ mơjiâng tơdroăng loi dêi kơchô tê mơdró mau kế tơmeăm pơrá athế tí tăng xiâm kối, ‘nâi kế tơmeăm xua kơbố pêt, túa pơkâ môi tiah lâi ƀă drêng pro xôi mê athế mơnhên hnoăng cheăng pôu râng. Drêng tí tăng xiâm kối châ xúa tŭm, ngin kô rơtế ƀă kong pơlê pêi pro tơdâng tơ’mô tơdroăng cheăng kố”.