Sap ing hâi lơ 1/12/2025 troh lơ 10/1/2026, mâu tíu pêi cheăng ối tung Khu xiâm pơkuâ Mô đô̆i, Kuân khu ƀă Khu xiâm pơkuâ Mô đô̆i kong pơlê hiăng mơhnhôk lối 204.600 roh kăn ƀô̆, mô đô̆i rơtế vâ chê 6.000 roh rơxế kơmăi kơmok ‘na mâu cheăm ki tro tơdjâk peăng mâ hâi Lo kong pơlê Dak Lak, tơkŭm po 331 khu mơjiâng pro ƀă 140 tôh rơnêu, tiô rêm pơlê, rêm rơpŏng.

Tơdroăng châ tơƀrê, troăng pêi cheăng ton xŏn pêi kêi đeăng mơjiâng 331 toăng hngêi ăm mâu rơpŏng tro tơhnâp tâi tâng, rơnêu 90 toăng hngêi tơ’nhê râ; tơdrêng amê rơnêu vâ chê 63.220 met troăng klông, hno têa drô klâng, teăm tơdrêng vêh pêt mơjiâng tơmeăm rơnó Xeăng tô.

Hneăng hôp kheăn kơdeăn tơdroăng ki hbrâ, pôu râng hnoăng cheăng dêi mâu khu cheăng ƀă tơdroăng môi tuăn krá ƀă cheăm bêng tăng kơxô̆ liăn, mơngế pêi cheăng, tơkŭm po mơjiâng pro, rak tơniăn ki dâi lĕm tơmeăm khoăng.