Klêi kơ’nâi 2 hâi drêng tơ’mot pơlâ Nhin mot tung thôn Nghiã Hưng 1 ƀă Nghiã Hưng 2, chiâng thôn Nghiã Hưng 2, cheăm Biển Hồ, ngoh Siu Ayun, mơngế ki châ kuăn pơlê loi tơngah dêi pơlê, hiăng rơtế ƀă kăn thôn lăm mơnhên ngăn mâu troăng prôk ki kuăn pơlê púi rơhêng vâ châ mĕn pro ƀă ƀê tong tâi tâng. Klêi kơ’nâi tơ’mot mâu thôn, pơlê, cheăm, tơdroăng ki kuăn pơlê kal ki vâ hlê plĕng ôh tá xê inâi krếo thôn, pơlê, mê ối cho tơdroăng ki kuăn pơlê hôm châ khu kăn hnê ngăn cheăm bêng rĕng gum pro klêi mâu hlá mơ-eá ki chêh ‘mot tung măng lơ ôh. Ngoh Siu Ayun tối ăm ngin ‘nâi, drêng tâng tối troăng tơdjâ ki vâ tơ’mot pơla 2 to thôn ki hên to nhŏng o Xuăn, hên ngế tung pơlê hiăng tô tuăn xua ai tơdroăng ki phá tơ-ê ‘na khôi túa, vêa vong, túa rêh ối-cheăng kâ. La klêi kơ’nâi hên xoh trâm, tơpui tơno, hnê tối ƀă mơhnhôk, vâi krâ kuăn pơlê pơrá hlê plĕng nhên, tơdroăng ki tơ’mot pơlê cheăm ôh tá pro pơhía lôi khôi túa, vêa vong dêi pơlê cheăm, mê ối tơveăng gum pro tơ’lêi hlâu vâ khu pơlê pơla achê dêi pó, tơveăng gum dêi pó, rơtế dêi pó vâ mơnhông.

“Trối pơla hdrối kố nah, ngin xuân hiăng hlo hnoăng pêi pro mê tro tuăn, ai kơ-êng vâ ‘nâi nhên, ai tối ‘na troăng prôk tung pơlê kơtâo. Kăn thôn nôkố kal cho mơngế ki hriâm kân tâ, rơkê plĕng tâ, hloh hlê rơkê plĕng, hơnăm ối nếo, pin krếo phôn môi xoh vâi hiăng tơmâng hlối. Á xuân pói tơngah, ing kăn thôn troh a kăn măt trâ̆n, athế pêi cheăng tá tuăn tá mơno xúa vâ tơveăng gum ăm kuăn pơlê rơtế achê ƀă kuăn pơlê, troh pôu ngăn ‘nâi tơdroăng kuăn pơlê púi rơhêng vâ hên tâ, mê nếo châ tơveăng gum kuăn pơlê păng ‘nâng”.

Hiâm mơno pói rơhêng vâ khu kăn hnê ngăn athế achê ƀă kuăn pơlê, mâu khu kăn hnê ngăn xuân athế troh pôu ngăn vâ ‘nâi tơdroăng kuăn pơlê púi rơhêng vâ, mê khu kăn nếo ‘nâi tơdroăng rêh ối-cheăng kâ kuăn pơlê a mâu pơlê cheăm ga ti lâi. Ƀă ngoh Đỗ Văn Túc-kăn thôn Nghiã Hưng 2, cheăm Biển Hồ tối, klêi kơ’nâi 15 hơnăm pơtối pro kăn thôn, hneăng ki nếo kố ai hên hnoăng cheăng, pôu hngăm hên tâ ‘nâng. Klêi kơ’nâi tơ’mot pơlê cheăm, tung thôn ki mê ai lối 600 rơpŏng, lối 2.400 pơ’leăng mâ mơngế. Tơnêi tíu kân rơdâ luâ tâ 3 xoh tâng vâ pơchông ngăn ƀă ahdrối nah. Tâng xuân ối rak túa ki pơkuâ hnê ngăn túa ton nah kô pá vâ châ rĕng ‘nâi tuăn mơno, tơdroăng púi vâ, tơdroăng ki tơngah dêi kuăn pơlê. Xua ti mê râ, klêi kơ’nâi hiăng ai tŭm mâu kăn hnê ngăn ki ngăn kơvâ cheăng, chi ƀô̆ ƀă Khu hnê mơhno Kuăn pơlê hiăng mơjiâng túa pơkâ cheăng i nhên ăm tơrêm hnoăng cheăng. Tiô tối hdrối, rêm măng tĭng, Khu hnê mơhno kuăn pơlê athế chu lăm troh a thôn pơlê, vâ veăng hôp ƀă kuăn pơlê, tơdrêng amê, hnối pơtối rak vế khu ki pơtối hôp đi đo ƀă kuăn pơlê vâ rĕng châ ‘nâi, rĕng châ mơnhên, tơleăng mâu tơdroăng ki kal ăm kuăn pơlê.

“Xua tơnêi tíu kân rơdâ, rơkong tơpui pơra phá, khôi túa vêa vong xuân pơrá phá. Langiâ kố ah, vâ chiâng xúa kŏng ngê̆ kơxô̆ mot tung tơdroăng rêh ối-cheăng kâ rêm hâi dêi kuăn pơlê, ngăn a pơlê cheăm dêi mơngế Xuăn vâi trối lâi, kuăn pơlê hdrông kuăn ngo ga trối lâi, vâ ing mê, teăm tiâ tối, tơveăng gum tơdrêng ăm kuăn pơlê, kăn ƀô̆ xuân pêi klêi dêi hnoăng cheăng, mê cho mâu tơdroăng ki á đi đo tô tuăn khât. Klêi kơ’nâi châ ai hlá mơ-eá pơkâ pơtroh, mê pin athế mơjiâng hlối hnoăng cheăng vâ pêi pro. Ahdrối nah, pin bố pơkuâ ngăn pơlê, cheăm iâ mơngế pin pêi cheăng tơ-ê, mê nôkố, kơdrâm kuăn pơlê iâ mơngế pơkuâ, pin pêi cheăng athế hên tâ, pôu hngăm hên tơdroăng cheăng tâ. Laga, nôkố, tơnêi tíu pơlê cheăm ga kân rơdâ, mê pin athế mơjiâng hnoăng cheăng ki xiâm, troăng pơkâ ki nhên hnối pêi adrêng ƀă tơdroăng ki vâ po rơdâ ƀă tơnêi tíu ki kân rơdâ, pơ’leăng mâ kuăn pơlê xuân kơdrâm tâ há”.

Ing 40 to thôn, pơlê hdrối nah, klêi kơ’nâi tơ’mot thôn pơlê, mê cheăm Biển Hồ ối pá 23 thôn pơlê, kơdroh châ 42,5%. Tơdrêng ƀă tơdroăng ki kơdroh khu kăn hnê ngăn, mê tíu kố xuân hiăng tăng rah xo mơngế kăn ƀô̆ ki rơkê kơhnâ khât, vâ rah xo pro Kăn pơkuâ hnê ngăn Chi ƀô̆, kăn thôn tro tiô troăng pơkâ tăng rah mơngế ki hriâm lâm kân, rơkê pêi hnoăng cheăng ƀă rơkê tung xúa kŏng ngê̆ tung pơkuâ hnê ngăn, pring vế kuăn pơlê.

Ối tung kơlo ki vâ mơnhông dêi kong pơlê, troh hâi lơ 2/7, Gia Lai hiăng pêi pro kêi tơdroăng ki vâ ‘mâi rơnêu, tơ’mot ing 2.693 chu ối 1.400 to thôn, pơlê, tôh kuăn pơlê kơphô̆, chu ối 1.293 tíu, tơdâng ƀă 48,01%.

Pôa Nguyên Thanh Vũ, Phŏ Ngăn ‘na Khu kăn ƀô̆ dêi kong pơlê Gia Lai tối ăm ngin ‘nâi, kơdroh tơdroăng ki khu kăn hnê ngăn lối hên, vâ ing mê, tí tăng rah xo mâu kăn ƀô̆ ki kơhnâ rơkê păngu ‘nâng vâ xo mot cheăng. Tơdroăng ki kal má môi mê cho tăng rah mơngế kăn ƀô̆ ki kơhnâ rơkê khât vâ pro pơkuâ a cheăm, vâ ing mê vâi kô ‘nâi nhên tơdroăng rêh kâ ối, pêi cheăng dêi rêm thôn pơlê, rĕng teăm gum kuăn pơlê hên tâ, tro tâ, xua hnoăng cheăng pơkuâ ngăn kal athế mơnhông a’ngêi ó tâ. Kong pơlê dế pơtối tăng rah mơngế ki rơkê kơhnâ khât, tơdrêng amê, hnối mơnhên tối ƀă mơjiâng troăng hơlâ ki vâ hnê tối, hnê mơjiâng mâu ngế ki vâ to pro Kăn pơkuâ hnê ngăn chi ƀô̆, kăn thôn tro tiô hiâm mơno púi vâ dêi kuăn pơlê a mâu cheăm tung chal ki nếo nôkố.

“Tiô tơdroăng Pơkâ kơxô̆ 185/2026/NĐ-CP ing hâi lơ 26 khế 5 hơnăm 2026 dêi Chin phuh, tung mê, pơcháu hnoăng cheăng ăm kong pơlê athế mơno tơdroăng pơkâ ‘na troăng hơlâ, klêi mê ai tơdroăng ki vâ hnê mơjiâng mâu kăn ƀô̆ tro tiô troăng pơkâ dêi Tíu xiâm Pơkuâ hnê ngăn Đảng hiăng mơ’no. Ƀă mâu ngế ki kố, ki kal athế hriâm tâi lâm 12 tơngi klêng. Ki má péa nếo, athế rơkê xúa kŏng ngê̆ thŏng tin. Kăn pơkuâ hnê ngăn chi ƀô̆ athế chiâng xúa kơmăi, phôn ki vâ chêh tối tung app, tung măng điê̆n tưh, kố cho môi pâ tung tơdroăng cheăng ki pêi tung măng internet. Ƀă khu kăn pơkuâ hnê ngăn chi ƀô̆ thôn pơlê, rêm hơnăm kố châ mơhriâm hnoăng cheăng. Lalâi hiăng ai tŭm mơngế ki rơkê tiah mê, kong pơlê kô ai troăng hơlâ pơtối po mâu lâm hnê mơhriâm ăm nhŏng o vâ kơ thăm rế tơniăn tung hnoăng cheăng ƀă pêi dêi hnoăng cheăng tơniăn tâ, tro tâ, rơkê tâ tung la ngiâ”.

Klêi tơ’mot mâu thôn pơlê, tôh kuăn pơlê kơphô̆, Gia Lai hiăng pro khu kăn pơkuâ a mâu cheăm, bêng, tôh kuăn pơlê kơphô̆ thăm rế iâ kuăn mơngế, tơkéa vâ tối chu kơdro vâ châ tơdế. La ki châ pơxúa dêi troăng tơdjdâ kố ôh ta xê to kơlo ki vê hdró hiăng chu kơdroh, mê ối cho tơdroăng cheăng pơtối mơjiâng khu kăn ƀô̆ ngăn ‘na pơlê cheăm tŭm ivá cheăng, pơhlêh nếo tung tơdroăng ki ối tung mơjiâng khu kăn ƀô̆ ngăn a pơlê cheăm ki rơkê kơhnâ, pơhlêh nếo tung túa pơkuâ ngăn vâ tơveăng gum kuăn pơlê.