A bêng Phú Yên, môi tung mâu tíu tro têa lu trâu, klêi têa xiâ, Tíu pêi cheăng pro hlá mơ-éa  hiăng thâ vêh pêi cheăng nếo pro hlá mơ-eá ăm kuăn pơlê. Rêm hâi, tíu pêi cheăng tơdah pro lối 100 hồ sơ, ki hên cho tâk tăm pŏng a hlá mơ-éa, hồ sơ tơnêi tíu, pro hlá mơ-éa rơpŏng hngêi. Jâ Hồ Thị Bước, thôn Lộc Đồng, ăm ‘nâi rôh kong mêi têa lân lu hiăng pro têa lu troh kuâ hngêi, tâi tâng tơmeăm khoăng ƀă hlá mơ-éa dêi rơpŏng hngêi xuân tro têa mơhiu. Vâ ai xiâm ki mơnhên klêi tơdroăng ‘na tơbriât tơnêi a hngêi tơleăng, jâ thế lăm a bêng pro néo hlá mơ-éa chêh kơnốu kuăn hiăng hlâ.

“A tơkôm xuân rĕng ôh tá ton, xua rup kơxô̆ troh alâi kôm gá troh. Mâu kăn ƀô̆ pêi cheăng pêi tơdrăng lĕm, hnê ăm pin pro nếo hồ sơ, vâi tơpui ro drêng pro ăm pin”.

Vâ kơdroh hâi chôu tơkôm ƀă kơjo kum kuăn pơlê tung tơdroăng xơpá kong mêi têa lu, mâu kăn cheăm bêng hiăng mơhnhôk tăng tơ’nôm hên ngế veăng pêi pro hlá mơ-éa. Pakĭng kăn ƀô̆, mâu kăn pơkuâ cheăng, mâu ngế pêi cheăng a tơpui phôn pơtroh kơthô xuân châ krếo troh veăng pêi pro mâu hlá mơ-éa.

Nâ Huỳnh Thị Lệ Chi, ngế pêi cheăng a Tíu tơpui phôn pơtroh kơthô bêng Tuy Hòa, châ mơhnhôk veăng kơjo kum a kơpong pêi cheăng bro hlá mơ-éa bêng Phú Yên, ăm ‘nâi tơdroăng cheăng tơkŭm kơjo kum kuăn pơlê pro klêi hồ sơ tung điê̆n tưh, malối cho mâu ngế hơnăm hiăng hên, hiăng krâ, iâ ‘nâi ‘na kŏng ngê̆.

“A kum kuăn pơlê chêh pro hlá mơ-éa ‘mot tung kơmăi, mâu hồ sơ mê ki hên cho tâk tăm pong bản sao, chêh mâu hlá mơ-éa ki tơdjâk troh tơnêi. A nếo klêi hnê, hlối chêh veăng kơjo kum ăm kuăn pơlê amê hlối”.

Tiô pôa Nguyễn Xuân Cảnh, Kăn hnê ngăn Vi ƀan kuăn pơlê bêng Phú Yên, kơ’nâi têa lu, kơxô̆ hồ sơ tâk kơdrâ hên, ai hên ngế hiá tâi tâng mâu hlá mơ-éa ki xiâm, ki kal. Hlo ti mê, cheăm bêng kong pơlê hiăng kĭch hoăt nếo mâu tôh pêi cheăng tung kơmăi chêh hlá mơ-éa dêi kuăn pơlê, thế mâu kăn ƀô̆ lăm troh a kơpong kuăn pơlê ối vâ hnê kuăn pơlê chêh bro dêi hlá mơ-éa, chêh tơ’nôm hồ sơ.

“Ƀơrô chêh pro hlá mơ-éa la lâi xuân xoăng thế ai 1-2 ngế ƀă khu ki hmâ pêi cheăng ki tro kơ luât. ‘Nâ hía thế mâu Đoân Droh rơtăm, mâu ngế cheăng a tíu tơpui pơtroh kơthô troh pêi cheăng, tối tơdjuôm ngăn tiô kơvâ cheăng, kal thế ai mơngế”.

 Ôh tá xê to bêng Phú Yên, tâi tâng mâu cheăm peăng mâ hâi Lo kong pơlê Dak Lak xuân tro tơdjâk xua têa lu. Tung mê, pái tíu xiâm pêi cheăng pro hlá mơ-éa a Hòa Xuân, Đông Hòa ƀă Tuy An Tây tro têa lu trâu, pro tơ’nhiê mâu tơmeăm ƀă tơdjâk troh tơmeăm khoăng mơjiâng pro. Mâu tíu pêi cheăng mê thế tâi tâng môi măng tĭng vâ tơkâ luâ xơpá ƀă vêh pêi cheăng môi tiah hdrối.

A cheăm Tuy An Đông, tíu xiâm pêi cheăng pro hlá mơ-éa dêi cheăm xuân hiăng tro têa lu, hên tơmeăm tơ’nhiê. La mâu kăn cheăm hiăng thâ ‘mâi rơnêu pro, xoăng mơngế pêi cheăng ôh tá ăm pơlê vâ pro hlá mơ-eá ăm kuăn pơlê. Pôa Trần Văn Biên, Kăn hnê ngăn Vi ƀan kuăn pơlê cheăm Tuy An Đông ăm ‘nâi:

" Troh nôkố tíu pêi cheăng cheăm hiăng pêi cheăng, dế mơ-eăm kơjo kum kuăn pơlê pro tơ’nôm rơnêu chêh nếo a mâu hồ sơ ki kal dêi rơpŏng hngêi. Nôkố kơxô̆ kăn ƀô̆ mâu kăn tơniăn, séa ngăn kal vâ dêi kuăn pơlê hên kô mơhnhôk tơ’nôm mâu hơnăm ối nếo, mâu ngế kơjo kum cheăng vâ ai tiô tơdroăng púi vâ pro hlá mơ-éa ăm kuăn pơlê”.

Môi khế kơ’nâi têa lân lu, mâu tơdroăng tơvâ tơvân ‘na pro hlá mơ-éa dêi kuăn pơlê a kơpong têa lu peăng mâ hâi Lo kong pơlê Dak Lak vâ tói hiăng pro klêi. Tơdroăng hbrâ tăng mơngế ƀă ‘mâi rơnêu po ngăn mâu kơmăi kơmok teăm kum mâu cheăm bêng môi tiah Tuy An Đông lơ Phú Yên ôh tá ai tơdroăng klâi pá tung tơdroăng ối hên sồ sơ hâi pro klêi. Mâu hlá mơ-éa mê châ pro ăm nếo hiăng teăm chiâng tơmeăm chêh pro tro luât vâ kuăn pơlê tơniăn cheăng kâ ƀă rĕng pêi viâ dêi mâu tơdroăng ki hâi pêi klêi kơ’nâi têa lân lu.