Pơtối pêi cheăng dêi rôh hôp má tơdrốu, Hô̆i đong kong pơlê Dak Lak hneăng 10, hâi lơ 13/7 mâu kăn tơpui tơno ‘na mâu tơdroăng ki kal tơdjâk troh pêi pro mâu pơkâ, tơdroăng cheăng pêi mơnhông cheăng kâ rêh ối, tơniăn cheăng lêng kring gak tơnêi têa hơnăm 2023 ƀă tơdroăng chêh tiô pơkâ. Pakĭng mâu khu troăng rơhlâ ‘na mơdêk xo liăn ngân ăm Tơnêi têa, tơ’mot khu ‘no liăn cheăng, mơdêk pro mâu troăng prôk,  pơtối rak vế mâu tơmeăm ai hlâu dêi tơrêm kong pơlê, mâu kăn tối Dak Lak kal tơmâng khât tâ nếo troh luât pơkâ ăm kuăn ngo, tơdroăng loi tĭng tiô khôp.

A rôh hôp má tơdrốu, Hô̆i đong kong pơlê Dak Lak hneăng 10, mâu kăn xuân mơdoh hên chôu tơpui ‘na mơdêk cheăng ‘na pơlê pơla ‘na hnê hriâm; xoăng kơxô̆ ƀiê̆n chê̆ tơtro ăm tơrêm kơ koan, tíu pêi cheăng, tí tăng ‘nâi plĕng, mơdêk mâu troăng rơhlâ pơtối mơdêk ki tơ ƀrê dêi tơdroăng mơjiâng thôn pơlê nếo; pơtối mơjâng mâu tơmeăm pêi lo OCOP, tơmeăm pêi lo hên dêi kong pơlê vâ châ xúa tê mơdró a kơchơ tung tơnêi têa ƀă kong têa ê.