Ai mâ a leh ăm rơxế kơtâu a troăng kân Khánh Hòa – Buôn Ma Thuột a hâi lơ 19/12 pơla kố nah, hên kuăn pơlê dêi kong pơlê kố tối phiu ro drêng mâu troăng prôk ki kân hiăng châ ăm rơxế prôk, tơngah kô prôk rĕng troh tâ, tơ’lêi hlâu ăm tê mơdró, mơnhông cheăng kâ, ôm hyô ƀă mơdêk pêi lo liăn. Pôa Nguyễn Văn Hạ, a cheăm Ea Knuêč, ai lối 4 sào tơnêi tung tơdroăng ki châ xo tơvêh, vâ pro troăng kố tối:

“Tơdroăng kố cho tơdroăng ki púi rơhêng vâ dêi kuăn pơlê akố, phiu ro khât, nôkố hiăng ai troăng prôk, tê mơdró prôk lăm, chơ tơmeăm pêi lo ing chiâk deăng dêi kuăn pơlê tơ’lêi hlâu tâ mâu rơxế châ prôk troh a kơdrum vâ krí dêi mâu tơmeăm mê gá chiâng kơnâ tâ há mâu tơmeăm pêi lo drêng tê malối cho rak tơniăn lĕm, má péa nếo cho yă tê châ mơdêk”.

Ôh ti xê to po troăng ăm to rơxế prôk, mâu troăng kân ối po ăm mâu tơdroăng tơnêi tơníu mơnhông nếo ăm mâu kơpong pêi cheăng kâ ki kal. Jâ Ngô Thị Minh Trinh, Kăn pơkuâ hnê ngăn Đảng cheăm Ea Knuêč –kong pơlê ai troăng prôk tơdrăng tơkâ luâ 6 to troăng prôk, tơdrêng amê hlối cho tíu ki pêt sầu riêng kân má môi kong pơlê ƀă lối 5.100 ha, tối tiah kố:

“Á tơchĕng sap ing mâu troăng prôk mê ai tơdroăng tơrŭm tê mơdró ƀă ai tơdroăng ki tơrŭm ‘na cheăng kâ rêh ối pơlê pơla ƀă túa lĕm tro nếo. Hdrối nah, tơring Krông Pač ton ngin hiăng pơkâ kơpong cheăng ƀă kơmăi kơmok dêi Tân Tiến, pakĭng mê, cho kơpong logistic vâ ai tơdroăng tơdjêp krá tơniăn ƀă châ xúa tâi ki ai hlâu ki pơxúa dêi rêm kong pơlê vâ tơdjêp chiâng môi kơpong vâ mơnhông cheăng kâ rêh ối pơlê pơla dêi kong pơlê”.

Tơdroăng tơkêa troăng prôk 3 to troăng kân Khánh Hòa – Buôn Ma Thuột xŏn 48km, prôk tơkâ luâ 7 to cheăm, rak vế hnoăng ki xiâm tung la ngiâ tơdjêp Tây Nguyên ƀă kĭng têa kơxĭ Peăng Hdroh tơdế tơnêi têa. Rơtế amê, Troăng kân Hồ Chí Minh cho troăng ví peăng mâ hâ Lo Buôn Ma Thuột xŏn vâ chê 40km dế veăng gum pro kơdroh tơdroăng hâ ho a troăng kơpong tíu xiâm, mơdêk tơƀrê tơdroăng ki prôk lăm tung mâu kơpong.

A peăng mâ hâi Lo kong pơlê Dak Lak, klêi kơ’nâi lối 10 hơnăm tơkôm, Tơdroăng tơkêa bro kơpong ôm hyô ối pơtê ki lĕm Cù Lao Mái Nhà hiăng păng ‘nâng pơxiâm pro a mơ’nui hơnăm 2025. Ƀă túa pơkâ xúa tơnêi ƀă rơngâ têa dâng 137ha, tâi tâng kơxô̆ liăn ‘no vâ chê 5 rơpâu rơtal, tơdroăng tơkêa bro kố châ tơngah pro ivá nếo ăm kơvâ cheăng kơmăi kơmok – tê mơdró, tơdrêng amê hlối tơleăng mơnhên tơdroăng ki tôu tuăn ‘na tơnêi pro tíu ôm hyô ki hên tơmeăm. Pôa Võ Văn Ngầu, a cheăm Ô Loan, tối:

“Roh tơdroăng tơkêa kố hiăng châ pơxiâm pro, xua tơdroăng kố hiăng ai sap ing ton nah, vâi krâ nhŏng o tơkôm khât. Hâi kố, ro troh ôh tá chiâng tơpui klâi xua Tơdroăng tơkêa tơbleăng pro a kong pơlê dêi tơná kô cho tíu ki bâ eăng”.

Ki khât gá ăm hlo, vâ pêi châ tơdroăng pơkâ pêi mơdêk 10% tơngi klêng tiô Pơkâ dêi kong pơlê, Dak Lak kal mâu tơdroăng tơkêa ki kân, ai ivá tơdjâk rơdêi. Nôkố kơpong kĭng têa kơxĭ hiăng ai 43 tơdroăng tơkêa bro châ hbru ăm phêp pro ƀă tâi tâng kơxô̆ liăn pro dâng 90 rơpâu rơtal. Tơdroăng ki xiâm cho tơdroăng pêi pro kơhnâ dêi mâu khu râ kơvâ cheăng ƀă kong pơlê tung tơdroăng rơtế prôk rơtế ƀă khu mơdró kâ, pơkâ tơleăng mâu tơdroăng tơvâ tơvân. Kố xuân cho tơdroăng ki mâu khu ki ‘no liăn pro dế tơkôm. Pôa Đào Mỹ, Phŏ kăn hnê ngăn Vi ƀan kong pơlê Dak Lak ăm ‘nâi:

“Ngin ai mâu mơ-éa chêh pro ăm tơdroăng kố thăm mơnhông ƀă ai tơdroăng hnê mơhno pơkuâ tơrêm kơvâ cheăng a mơ-éa mê ngin kô séa ngăn tơrêm hơnăm vâ rơtế ƀă dêi rơpó pêi ƀă pêi troh ‘na ngiâ”.

Tiô túa pơkâ, peăng mâ hâi lo kong pơlê Dak Lak kô pơtối pơxiâm pro hên tơdroăng tơkêa bro ki kân, tung mê ai 3 tơdroăng tơkêa bro ki kal a Kơpong cheăng kâ peăng Hdroh Phú Yên mê cho: Kơno tuk Bãi Gốc, troăng klông Kơpong cheăng kơmăi kơmok Hòa tâm ƀă Kơpong cheăng kơmăi kơmok rơxông nếo Phú Yên, ƀă tâi tâng kơxô̆ liăn ‘no pro dâng 5 rơtal USD pro a tơnêi 750ha. Mâu tơdroăng tơkêa bro kố châ tơngah mơhnhôk tơnêi pro a kĭng têa kơxĭ, pro ivá cheăng ăm kơpong cheăng kơmăi kơmok – mơjiâng pro pơtối rak vế hnoăng ‘no liăn xiâm thăm mơnhông tung hơnăm 2026 ƀă mâu hơnăm ki pơtối.