Tung 5 hơnăm hiăng hluâ, Tơdroăng hiăng châ pêi pro tơdâng tơ’mô a tâi tâng mâu kong pơlê, pơlê kong kơdrâm; hiăng tơkŭm po lối 300 rơpâu lâm hnê pơtâp, pơtâng tối ‘na rak tơniăn lĕm kế kâ; mơhnhôk lối 8,5 rơtuh rơpŏng ƀă tíu pêi cheăng kŭn kĭ tơkêa pêt mơjiâng, tê mơdró tơmeăm pêi lo ing chiâk deăng, cheăng kâ pêt rak ngăn kong ká xi xŏng tơniăn lĕm.

Tơdroăng xuân hiăng tŏng gum mơjiâng chât rơpâu troăng pêt mơjiâng tơmeăm pêi lo ing chiâk deăng tiô pơkâ VietGAP, hưh cơ, pêi chiâk deăng krúa lĕm kong prâi, têk chu chu têk; vâ chê 9 rơpâu tơmeăm OCOP; rơpâu khu tơrŭm cheăng ƀă ivá tơbriât dêi tơmeăm pêi lo ing chiâk deăng tung kơchơ mơdró tung tơnêi têa ƀă tê ngi kong têa ê.

Mơgêi Hneăng hôp, pôa Lê Thành Long, Phŏ Ngế pro xiâm hnê ngăn tơnêi têa tối rơdêi,  tung la ngiâ kal pơhlêh ó rơdêi ing pơtâng tối troh tơdroăng hnê mơhno pêi; pơhlêh tơdroăng pêi dêi mơngế pêt mơjiâng tơmeăm, ki má lối cho kơpong rơpŏng kŭn iâ êt; mơdêk mơjiâng troăng pêt mơjiâng krúa lĕm, tơrŭm cheăng ki tơdjâk, têk chu chu têk, ƀă pơhlêh xúa kŏng ngê̆ ƀă tơmiêt pêi rơkê. Mâu râ kơvâ cheăng tơniăn mơngế pêi cheăng rơtế kuăn pơlê tơmiât troh pơkâ pơtê tơdroăng pêt mơjiâng tơmeăm, tê mơdró tơmeăm ki ôh tá tơniăn lĕm, rak vế ivá pơlê pơla ƀă mơnhông pêi chiâk deăng krá tơniăn.