Tiô Khu pơkuâ ngăn tơdroăng tơkêa bro ‘no liăn pro mâu kế tơmeăm ƀă kơmăi kơmok kong pơlê Dak Lak, pái tơdroăng tơkêa bro a mâu cheăm Buôn Đôn, Ia Rvê ƀă Ia Lốp pơrá hiăng pro klêi châ 80% tơdroăng cheăng. Mâu khu ki xo pro dế tơkŭm pro klêi mâu tơdroăng ki ‘meăm krâ, mâu troăng kih thuât, kế tơmeăm xúa ƀă mơeăm khŏm pro klêi hdrối hâi lơ 6/8. Vâ rak tơniăn tơdroăng pro, Khu pơkuâ ngăn tơdroăng tơkêa kố ối tơbleăng pêi rôh pro ki kal “70 hâi măng ôh tá pơtê”, pơtroh kăn ƀô̆ lăm ngăn a mâu tíu pro; Khu pơkuâ ngăn lêng kong pơlê Dak Lak xuân pơtroh mâu khu lêng lăm tŏng gum pro. Rơtế ƀă mê, Khu pơkuâ ngăn tơdroăng tơkêa dế chêh pro klêi hồ sơ ‘no pêi cheăng pro Hngêi trung phôh thong kâ tíu kâ koi ối pơtê péa râ cheăm Ea Bung. Pôa Võ Văn Lợi, Phŏ pơkuâ Khu pơkuâ ngăn tơdroăng tơkêa bro ‘no liăn pêi cheăng ƀă kơmăi kơmok kong pơlê Dak lak ăm ‘nâi:

“Ƀă tâi tâng mâu tíu pêi cheăng, hiăng tơkâ luâ xơpá ‘na mâu ngế cheăng, xơpá ‘na hyôh kong prâi, xơpá ‘na pơto chơ tơmeăm vâ pro tơdroăng tơkêa tơdjuôm. Nôkố 3 to hngêi trung pơrá hiăng pro troh 80% mâu tơdroăng cheăng . Ƀă tơdroăng kố kô ai mâu kế tơmeăm pro hâi lơ 15 khế 7 kô pro klêi tâi tâng mâu kế tơmeăm ki kal pro, tung mê ai tá krâ ‘măn mâu kế tơmeăm xúa tung hnê ƀă hriâm. Rak tơniăn tơdroăng ki pro tiô hnê mơhno dêi Khu xiâm pơkuâ cheăng kal kí xuân môi tiah kăn pơkuâ ngăn Dak Lak, Hô̆i đong hnê ngăn ƀă Vi ƀan hnê ngăn Kuăn pơlê”.

Kong pơlê Lâm Đồng dế tơbleăng pro 5 to hngêi trung hdrông kuăn ngo ai tíu kâ koi ối pơtê péa râ a mâu cheăm tơkăng kong mê cho Quảng Trực, Thuận An. Tuy Đức, Thuậ hạnh ƀă Dak Wil, ƀă tâi tâng kơxô̆ liăn pro lối 1.140 rơtal liăn. Mâu cheăm bêng dế khŏm mơeăm vâ pro klêi mâu tơdroăng tơkêa kố rĕng tâ túa pơkâ, rak tơniăn tŭm tơdroăng ki vâ xúa tung hnê ƀă hriâm sap ing apoăng hơnăm hriâm nếo.

Tung mê, péa tơdroăng tơkêa pro Hngêi trung phôh thong ai tíu kâ koi ối pơtê péa râ a mâu cheăm tơkăng kong Quảng Trực ƀă Thuận An dế châ mơdêk rĕng tơdroăng ki pro. Troh nôkố, ‘na ki kal dêi hngêi trung hiăng pro klêi; mâu khu ki xo pro pơtroh tơ’nôm mâu ngế cheăng pro, kế tơmeăm, tơkŭm tơ’nôm mâu ngế pro, tơ’nôm chôu pro vâ pro klêi hdrối hâi lơ 15/8, rĕng tâ 15 hâi tâng vâ pơchông ƀă pơkâ. Jâ Lê Thị Bích Liên, Kăn pơkuâ Khu ngăn hnê hriâm ƀă hnê mơjiâng tuăn ngoâ rơkê kong pơlê Lâm Đồng ăm ‘nâi:

“Khu ngăn hnê hriâm ƀă hnê mơjiâng tuăn ngoâ rơkê hiăng pêi cheăng tơdrêng ƀă cheăm hên xôh ƀă hiăng môi tuăn ƀă cheăm túa pơkâ xing xoăng hok tro ƀă khu hiăng pro klêi túa pơkâ xoăng hok tro. ‘Na thái cô hnê Khu ngăn hnê hriâm ƀă hnê mơjiâng tuăn ngoâ rơkê hiăng tí tăng ‘nâi plĕng tơdroăng ki pơtroh ƀiên chê̆ sap ing kơpong dêi Bình Thuận ƀă Lâm Đồng vâ pơtroh ăm 2 to hngêi trung a tíu tơkăng kong”.

Tơdroăng ki rĕng pro klêi mâu hngêi trung hdrông kuăn ngo ai tíu kâ koi ối pơtê a mâu cheăm tơkăng kong kơpong Tây Nguyên ôh tá xê pêi pro tiô tơdroăng púi vâ ki hdrối tâ ‘na hngêi trung hriâm ăm hơnăm hriâm nếo, mê ối mơhno tơdroăng ki tơmâng ngăn dêi Đảng ƀă Tơnei têa ƀă tơdroăng cheăng hnê hriâm kơpong tơkăng kong.