Ing mê, Chin phuh dế pâ thế 20 tơdroăng kal chêh pơtroh ăm Kuô̆k hô̆i séa ngăn, tơbleăng. Pôa Trần Thanh Mẫn, Kăn xiâm hnê ngăn Kuô̆k hô̆i ăm ‘nâi, sap nôkô troh mơ’nui hơnăm, tơdroăng cheăng pơkâ hên ƀă Kuô̆k hô̆i, Vi ƀan pơkuâ cheăng Kuô̆k hô̆i, Chin phuh ƀă mâu kơ koan tơdjâk troh hên. Malối cho mâu tơdroăng cheăng mơjiâng luât tiô tơdroăng dêi rôh Hôp tơbleăng troăng hơlâ luât pêi pro tro hneăng Kuô̆k hô̆i má 16 ƀă tơdroăng cheăng hbrâ troh mâu rôh vâ Hôp la ngiâ.

Tối nhên sap nôkố ta troh mơ’nui hơnăm, pakĭng tơdroăng cheăng mơjiâng luât ối ai hên cheăng pêi ki kal ‘na séa ngăn ƀă tơpui kâ a Kuô̆k hô̆i râ má môi, tung mê, ai tơdroăng tơkŭm po Hôp ‘na Luât ƀă hneăng hôp dêi Kuô̆k hô̆i ‘na tơdroăng cheăng séa ngăn hơnăm 2026 tung pái khế apoăng hơnăm, Kăn xiâm hnê ngăn Kuô̆k hô̆i pơkâ thế mâu kơ koan khu râ pơkuâ cheăng séa ngăn ngế tơdroăng, rơkŭm pêi kơtăng, pêi tơbrê.