Kơ’nâi 2 hâi pêi cheăng, kơxê hâi lơ 13/7 rôh hôp má 6, Hô̆i đong hnê ngăn kong pơlê Dak Lak hneăng 10 hiăng mơgêi. Rôh hôp hiăng vâ môi tuăn tơbleăng hên tơdroăng Pơkâ ki kal tung mơnhông cheăng kâ rêh ối dêi kong pơlê tung la ngiâ.

Tối tơbleăng mơgêi rôh hôp, jâ Huỳnh Thị Chiến Hoà, Kăn hnê ngăn Hô̆i đong kong pơlê Dak Lak pơkâ thế, Vi ƀan hnê ngăn kong pơlê, rêm râ, mâu kơvâ cheăng, tơring cheăm thế ngăn tơdroăng cheăng mơnhông cheăng kâ-rêh ối, tơniăn ‘na cheăng lêng kring gak tơnêi têa cho tơdroăng cheăng ki kal má môi dêi 6 khế mơ’nui hơnăm kố.

Tơdrêng amê, Hô̆i đong hnê ngăn kong pơlê pơkâ thế mâu kơvâ cheăng, rêm râ mơdêk hnê tối trâu rơdâ troh kuăn pơlê mâu troăng rơhlâ ki kal dêi Đảng, luât tơnêi têa ‘na mâu troăng rơhlâ, luât pơkâ mơnhông cheăng kâ rêh ối kơpong hdroâng kuăn ngo, luât pơkâ tơrŭm môi tuăn dêi hdroâng kuăn ngo dêi Đảng, Tơnêi têa vâ kuăn pơlê môi tuăn pêi pro.

A rôh hôp, Hô̆i đong hnê ngăn kong pơlê Dak Lak xuân hiăng têk kŏng tiâ vâ môi tuăn tơbleăng 06 tơdroăng pơkâ dêi luât, 10 pơkâ ki krê ƀă pâ thế hên tơdroăng kal ki ê ƀă  hên ngế vâ môi tuăn.