‘Na hnoăng cheăng, Khu xiâm tơkŭm hriăn ngăn, mơgêi tơdroăng ki ai khât, tí tăng ‘nâi plĕng ‘na pơhlêh nếo tơkŭm po ƀă tơdroăng cheăng dêi Kuô̆k hô̆i, Vi ƀan pơkuâ Kuô̆k hô̆i, mâu kơ koan dêi Kuô̆k hô̆i; mơdêk ki rơkê plĕng tung mơjiâng luât, séa ngăn, pơkâ mâu tơdroăng ki kal dêi tơnêi têa; tơkŭm po ƀă pêi cheăng tiô kuăn pơlê vâ, trâm mâ kuăn pơlê, séa ngăn tơdroăng ki tŏng gum tơleăng rơkong pâ thế dêi kuăn pơlê; pơhlêh xúa kong ngê̆, tíu chêh ‘măn ‘noăng chư chêh, ứng dụng tuăn ngoâ rơkê xua kuăn mơngế pro, tơrŭm cheăng ƀă kong têa ê, tơpui kâ ‘na kuô̆k hô̆i; veăng tơpui, tối tơbleăng, veăng ăm rơkong tơpui ƀă mâu tơdroăng pơkâ, tơdroăng túa tối tơbleăng ki kân ối tung hnoăng pơkuâ, hnê mơhno dêi Đảng ủi Kuô̆k hô̆i drêng châ xoăng ƀă pêi pro mâu hnoăng cheăng ki ê xua ngế ki ai hnoăng pơcháu.

A Rôh hôp, Khu pơkuâ cheăng Đảng ủi Kuô̆k hô̆i hiăng môi tuăn ƀă hlá mơ-éa pơtroh ƀă tơbleăng pơkâ mơjiâng Tíu cheăng Hriăn ngăn chuyên dề ối tung Đảng ủi Kuô̆k hô̆i; Vi ƀan pơkuâ Kuô̆k hô̆i hiăng môi tuăn ƀă hlá mơ-éa pơtroh ƀă tơbleăng pơkâ mơjiâng Khu xiâm cheăng xúa kong ngê̆ kơxô̆ ối tung ƀơrô cheăng Kuô̆k hô̆i.