A kơno tuk mâu lêng Cam Ranh, mâu ngế pêi cheăng tung Tuk Mui tung kơdâm têa kơxĭ 189 Khu lêng têa kơxĭ dế kơhnâ pơtâp mâu troăng hbrâ tơplâ. Ƀă mâu kăn ƀô̆, mâu ngế pêi cheăng tung tuk, pơkuâ tuk ki mui tuk têa Kilo 636 rơxông nếo ôh tá xê to tơdroăng hâk tơngăm mế ối cho hnoăng cheăng ki má môi. Ƀă inâi krếo ‘’klôh prăng tung kơdâm têa kơxĭ’’, tuk mui tung têa kơxĭ Kilo 636 ai chiâng tơplâ tiô rơxông nếo, pơkâ thế kăn ƀô̆, mâu ngế pêi cheăng tung tuk thế ‘nâi inhên, ai hnoăng pơkuâ ƀă xúa châ tơƀrê vâ tơrŭm krá ƀă mâu khu lêng, gâk kring krá tơniăn hnoăng pơkuâ têa kơxĭ, rơlố Tơnêi têa. Thươ̆ng tă Hàn Văn Hiếu, Pơkuâ tuk mui tung têa kơxĭ 182 – Hà Nội, tối ăm ‘nâi:

“Ngin đi đo ngăn hnê pơtâp cho hnoăng cheăng tíu xiâm, xo tơdroăng pêi pơkuâ xiâm, pơtâp tung tơdroăng tơtro tơdroăng nôkố tơplâ vâ mơdêk ivá hbrâ rơnáu tơplâ, pơkuâ tâi tâng tuk mui tung têa kơxĭ, hbrâ tơdah ƀă kêi đeăng lĕm tro hnoăng, gâk kring krá tơniăn hnoăng pơkuâ têa kơxĭ, rơlố dêi Tơnêi têa’’.

Ƀă ki phá tơ-ê dêi môi tíu ki tơviah má môi, troăng prôk dêi rêm rôh prôk têa kơxĭ cho môi tơdroăng pơloăng mơnúa. mâu kăn ƀô̆, mâu ngế pêi cheăng tung tuk mui têa kơxĭ hên hâi đi đo ôh tá hlo trâ eăng mâ hâi. Tíu rêh ối hâ, ôh tá tŭm hyôh. Bu môi tơdroăng ki xôi kŭn xuân kô tơdjâk troh tơniăn dêi tâi tâng tuk. Tiô thươ̆ng tă Nguyễn Văn Thuân, Cheăng kal kí Tuk mui tung têa kơxĭ 183 - Pơlê kong kân Hồ Chí Minh tối ăm ‘nâi: pakĭng ki rơkê pêi cheăng, mơngế lêng tuk mui tung têa kơxĭ ối thế rơkê chân kal kí krá ƀă tuăn ihiâm mơno krá tơniăn vâ pêi pro hnoăng tung têa kơxĭ trâu hơngế.

“Hnoăng dêi ngin cho hnoăng cheăng ki phá tơ-ê, a tuk mê rêm ngế môi tiah môi, tâi tâng kăn ƀô̆, mâu lêng thế rŭm chiâng môi khu. Bu kal môi tíu lơ môi ngế krê ai ihiâm tuăn tơmiât ôh tá khên, ôh tá krá kô tơdjâk tâi tâng tung tuk ƀă tơdjâk tơdrêng troh tơdroăng kêi đeăng hnoăng cheăng tơdjuôm dêi tíu cheăng. Xua mê, drêng rêm rôh prôk mui tung têa kơxĭ, tâi tâng khu lêng tung tuk pơrá tơdjuôm troăng prôk la ngiâ, tơdjuôm pơkâ pêi plah, mơjiâng rơkê chân kal kí krá, rak ihiâm mơno tơrŭm môi tuăn, môi tuăn sap apoăng troh tá tui lui ƀă mơ-eăm hên vâ kêi đeăng hôm rêm hnoăng cheăng châ pơcháu’’.

Iâ ngế ‘nâi, vâ ai mâu troăng prôk tơniăn hâi kố, mâu rơxông kăn ƀô̆ tung tuk dêi Lưh đoân 189 Khu lêng gâk kring têa kơxĭ thế tơkâ hluâ hên pá puât. Ing tơdroăng hriâm nâl kong têa ê, pro hmâ ƀă mâu kih thuât ki pá troh ‘nâi kŏng ngê̆ rơxông nếo má môi lâp plâi tơnêi ... tâi tâng pơrá cho mâu pơloăng mơnúa ôh tá kŭn. Trung tă Nguyễn Đình Danh, Tuk mui 186 – Đà Nẵng, tối:

“Sap ing châ achê ‘noăng chư chêh ‘na tơdroăng cheăng, ngin hiăng kơhnâ ngăn hriăn plĕng, tối ăm dêi pó, tơpui tơno ƀă dêi pó tiô khu, rêm khu, kơ’nâi mê xúa mâu túa ki rơkê tơtro châ hriâm tung tơnêi têa hlôi hriâm mâu yăo trinh châ hnê mơjiâng a kong têa ê vâ rĕng ‘nâi krá lĭ thuyê̆t. Drêng châ hriâm tâp ƀă pât tơdrêng a tuk, ngin xúa tâi tâng chôu vâ pât, ‘nâi tŭm tơdroăng xúa, pât ƀă rak lĕm mâu kơmăi kơmok tung tuk. Kơnôm mê, kăn ƀô̆, mâu lêng tung tuk ƀă rĕng chiâng xúa pháu hnêa tung tuk, chiâng xúa kih thuât rơxông nếo’’.

Ing lâm hriâm apoăng tá hâi ‘nâi nhên dêi mâu ngế lêng tung tuk mui têa kơxĭ a kong têa Rusi, ing mâu hâi kơhnâ hriâm a thao trương, tung kơmăi troh tíu xiâm hnê pơtâp tuk mui têa kơxĭ a Cam Ranh ƀă tung têa kơxĭ trâu, troh nôkố kăn ƀô̆, mâu lêng tung tuk Lưh đoân 189 hiăng chiâng pât tuk mui têa kơxĭ Kilo 636 rơxông nếo. Thươ̆ng tă Phan Thanh Quang, Phŏ Lưh đoân trương, Kăn pơkuâ, Lưh đoân Tuk mui têa kơxĭ 189 Khu lêng gâk kring têa kơxĭ tối ăm ‘nâi:

“Mâu hơnăm hiăng hluâ, Lưh đoân hiăng đi đo pêi pro rơdêi tơdroăng hnê hriâm kal kí, tuăn ihiâm mơno, pro xiâm kối vâ mơdêk tơdroăng ki khŏm mơ-eăm ƀă ihiâm mơno pôu râng hnoăng cheăng tung pêi pro hnoăng cheăng, tơkŭm hnê khôi túa vâi krâ nah, tơdroăng hâk tơngăm, hâk ro châ pêi cheăng, pleăng hnoăng cheăng tung khu; mơnhông tơdroăng ki hâk vâ, tâi ihiâm mơno, hlê plĕng hnoăng cheăng, pôu râng hnoăng dêi kăn ƀô̆, mâu lêng tung tuk tung tơdroăng hriâm tâp ƀă pêi cheăng. Mơnhông khôi túa vâi krâ nah “Tơrŭm môi tuăn, kih luât, pơkí, khŏm ƀlêi trâng” dêi đông lêng Ngế khên tơnôu khu lêng kuăn pơlê, kăn ƀô̆ mâu lêng Lưh đoân Tuk mui 189 kô pơtối tơrŭm môi tuăn, hbrâ tah lôi pá puât, khŏm mơ-eăm pêi kêi đeăng rêm hnoăng cheăng châ pơcháu, gum gâk kring krá tơniăn hnoăng pơkuâ têa kơxĭ, rơlố krih tơviah dêi Tơnêi têa’’.

Tung hneăng nôkố, hnoăng cheăng gâk kring hnoăng pơkuâ tơnêi têa tung têa kơxĭ dêi Lưh đoân tuk mui têa kơxĭ 189 Khu lêng gâk kring têa kơxĭ rế hngăm ngo. 15 hơnăm – môi troăng prôk tá hâi xŏn laga chiâng vâ mơnhên tíu cheăng dêi môi khu lêng ki lĕm tui tơdroăng ƀeăn ƀĕng dêi Khu lêng gâk kring têa kơxĭ kuăn pơlê Việt Nam. Tung dế têa kơxĭ trâu hơngế, mâu ngế lêng tuk mui xuân ôh tá pơ’lok pleăng hnoăng cheăng, ôh tá pơ’lok tung hnoăng gâk têa kơxĭ Tơnêi têa. Mâu ngế lêng ki phá tơ-ê tung tíu cheăng ki má môi – dế chêh pơtối ‘’Tơdroăng rơhdruê tơnôu rak têa kơxĭ’’ ing têa kơxĭ kân rơdâ, gâk kring krá tơniăn hnoăng têa kơxĭ, rơlố, tơnêi tơníu krih tơviah dêi Tơnêi têa.