A rôh hôp Hô̆i đong kô séa ngăn tâi tâng mâu tơdroăng cheăng, tơdroăng hbrâ vâ po Hôp tơ’noăng pâ nhoăm tơnêi têa tung lâp tơnêi têa rôh má 11 po a hâi lơ 26-27/12; hlối séa ngăn troăng hơlâ ‘na tơdroăng séa ngăn pơxá inâi “Khên tơnôu mâu lêng kuăn pơlê’’, pơxá “Khên tơnôu pêi cheăng’’ ăm mâu khu pú hên, mâu ngế krê.

Hâi hôp tơ’noăng pâ nhoăm tơnêi têa tung lâp tơnêi têa cho hâi leh kân kal kí dêi tơnêi têa, hvái ngăn 5 hơnăm hdrối tơ’noăng pêi cheăng - môi hneăng pêi cheăng tơviah, hên tơdroăng hâi chói hlo ai. Hâi hôp ối cho tíu ki tơkŭm, tơbleăng tuăn pâ tơnêi têa, tuăn mơ-eăm, tuăn tơmiêt púi vâ pleăng hnoăng tơná dêi tâi tâng hdroâng mơngế, po môi hneăng tơ’noăng ki nếo, djâ tơnêi têa mơnhông kro mơdrŏng, rơkê plĕng, hơhiâp ro.

Tơbleăng mơgêi rôh hôp, pôa Phạm Minh Chính, Ngế pro xiâm hnê ngăn tơnêi têa khĕn kơdeăn mâu khu rah chêh tơdroăng kal xiâm hiăng mơ-eăm tơmâng pêi tro mâu tơdroăng cheăng hbrâ tơkŭm po Hôp kân tơ’noăng pâ nhoăm tơnei têa. Ngế pro xiâm hnê ngăn tơnêi têa tối pơchân kal thế pêi tơdrêng hlối tơdroăng tơbleăng mơđah um tơmeăm khoăng mơhno hnoăng hiăng châ chiâng pêi pro tung cheăng kâ - pơlê pơla dêi tơnêi têa kơ'nâi 40 hơnăm hơ’lêh nếo; mơđah tơbleăng um pơxá “Tơ’noăng pâ nhoăm tơnêi têa - xua môi Việt Nam rơdêi’’.

Tơdrêng amê, tơkŭm tối ăm ‘nâi mâu tơdroăng ‘na Hâi hôp tơbâ ki rơdêi hiâm mơno pâ tơnêi têa, hâk tơngăm hdroâng mơngế, tơbleăng troh lâp lu tơdroăng mơhnhôk tơ’noăng tung pơlê pơla, pro xiâm vâ mơhno mơnhông tơnêi têa tung mâu hơnăm pơtối.