Tiô rơkong krếo thế dêi pôa Phạm Minh Chính, Ngế pro xiâm hnê ngăn tơnêi têa, pôa Pedro Sánchez Ngế pro xiâm hnê ngăn kong têa Tây Ban Nha lăm pôu Việt Nam sap hâi lơ 8/4 troh hâi lơ 10/4.

Kố cho rôh apoăng Ngế pro xiâm hnê ngăn kong têa Tây Ban Nha lăm pôu Việt Nam riân sap péa tơnêi têa mơjiâng tơrŭm tơpui kâ a hơnăm 1977 nah ƀă xuân cho rôh lăm pôu khât Việt Nam dêi Ngế pro xiâm hnê ngăn kong têa Tây Ban Nha riân sap hneăng lăm pôu dêi pơtáu Juan Carlos kơdrâi pơtáu  Sofia a hơnăm 2006.

Tây Ban Nha cho kong têa tung khu ki apoăng dêi Khu tơrŭm châu Âu  kĭ tơhrâ tơrŭm cheăng ƀă Việt Nam a hơnăm 2009 nah. Kong têa kố xuân cho môi tung mâu kong têa ki apoăng kĭ Tơhrâ tơniăn kring vế ‘no liăn pêi cheăng dêi EU - Việt Nam. Hneăng lăm pôu mơhno tơdroăng tơrŭm tơniăn lĕm pơla péa tơnêi têa tung mâu hơnăm hdrối mê hía nah, ing tơdroăng kal kí troh cheăng kâ, tê mơdó ‘no liăn pêi cheăng mơjiâng tơmeăm khoăng, ‘na túa lĕm tro, cheăng lêng, kring tơniăn, hnê hriâm- hnê mơjiâng tuăn ngôa rơkê ƀă ‘na troăng prôk rơxế kơtâu.