Kơxê lơ 12/1, pôa Phạm Minh Chính, Ngế pro xiâm hnê ngăn Chin phuh, Ngế xiâm Hnê mơhno Tơnêi têa ‘na chêh ‘măn tung kơmăi, hiăng pơkuâ po Rôh hôp má Môi dêi Khu hnê mơhno cheăng, châ tơkŭm po tơdrêng a Tíu pêi cheăng Chin phuh ƀă ‘no tơdrêng ing troăng hyôh internet troh a 34 to kong pơlê, pơlê kong kân tung lâp tơnêi têa. Tiô pơchuât tơbleăng, cheăng tơbleăng tơdroăng ki chêh ‘măn dêi tơnêi têa ‘na tíu ối kuăn pơlê hiăng pro tơƀrê khât, ƀă 107 rơtuh tơdroăng kal ‘na kuăn pơlê châ pơkuâ ngăn ƀă 50 tơdroăng ki ai pơxúa châ tối tơbleăng tung tíu VNeID, veăng gum pro kơdroh 30 – 50% liăn hrê tiô tơdroăng pơkâ ăm kuăn pơlê ƀă khu mơdró kâ.

Troh nôkố, 3.289 tung tâi tâng 3.321 to cheăm, bêng hiăng pơrá chêh ‘măn tơdrêng, tŭm têk a kong pơlê cheăm bêng tơdroăng ki kal dêi tơnêi têa ƀă ‘na tơnêi tíu. Tơpui hnê mơhno, Ngế pro xiâm hnê ngăn tơnêi têa tối nhên, tơmeăm ki chêh ‘măn cho tơdroăng vâ mơnhông tuăn ngoâ rơkê, xua mê tâi tâng tá khu xiâm, kơvâ cheăng, kong pơlê athế rĕng pro, tơdjêp ƀă tí tăng tơƀrê tíu chêh ‘măn tơdroăng kal.