Tiô tối tơbleăng a rôh hôp, tung rôh kong mê khía mơhot têa kân lân lu pơla kố nah, mâu hngêi ki tro tơ’nhiê, kơtong athế châ pro nếo cho 1.597 toăng, troh nôkố hiăng pro kêi 671 toăng, u ối dế pro. Mâu hngêi ki tơ’nhiê cho vâ chê 34.800 toăng, nôkố hiăng ‘mêng pro klêi.

Kăn pơkuâ kong pơlê Dak Lak ăm ‘nâi tung la ngiâ ah kô vêh séa ngăn, pro hngêi ăm kuăn pơlê ối vâ hbrâ ví mê khía mơhot têa kân lân lu. Kong pơlê Gia Lai dế tơkŭm pro 38 kơpong pro pơlê nếo ăm kuăn pơlê, khŏm ‘mâi xê̆n kuăn pơlê lo ing kơpong ki tro tơdjâk troh tíu ối tơniăn. Khu xiâm pơkuâ ngăn lêng hiăng mơhnhôk, pơtroh 176 rơpâu ngế kăn ƀô̆, mố đô̆i, khu lêng ƀă lối rơpâu toăng rơxế tơrŭm ƀă kăn pơkuâ kong pơlê gum kuăn pơlê ‘mêng, pro hngêi ối.

Khu xiâm ngăn Kŏng an hiăng pơtroh lối 11 rơpâu ngế kăn ƀô̆ lêng gum kuăn pơlê ‘mâi mơnhông dêi kế tơmeăm khoăng xua khía mơhot têa kân lân lu. A rôh hôp, pôa Phạm Minh Chính, Ngế pro xiâm hnê ngăn tơnêi têa ro drêng ‘Cheăng pêi thâ Quang Trung” klêi kơ’nâi 1 khế tơbleăng pro hiăng pro klêi tâi tâng hngêi ki ‘mêng rơnêu, tro ƀă tơdroăng pơkâ mơ’no. Ngế pro xiâm hnê ngăn tơnêi têa pơkâ thế pro iâ hâi khế, mơeăm troh hâi 15/01/2026 khŏm pro klêi mâu hngêi ki tơhnâp, kơtong vâ kuăn pơlê ai hngêi ối hdrối vâ po Hneăng hôp khu kăn lâp tơnêi têa rôh má XIV dêi Đảng.