Kơxo hâi lơ 20/7 a Hà Nội, pôa Phạm Minh Chính, Ngế pro xiâm hnê ngăn Chin phuh , kăn hnê ngăn Hô̆i đong xing xoăng tơdroăng cheăng pêi kơpong tơbăng Kroăng Hồng pơkuâ hôp Hô̆i đong xing xoăng tơdroăng cheăng pêi kroăng Hồng rôh má môi. A hneăng hôp, Khu xiâm Pơkâ ‘no liăn mơjiâng tơmeăm khoăng tơbleăng Pơkâ dêi Ngế pro xiâm hnê ngăn Chin phuh ‘na mơjiâng Hô̆i đong xing xoăng tơdroăng cheăng kơpong tơbăng Kroăng Hồng.

Ing mê, Hô̆i đong xing xoăng tơdroăng cheăng kơpong châ mơnhên ôh tá xê môi râ cheăng pro hlá mơ-éa la túa tơrŭm cheăng pêi tơƀrê vâ séa ngăn, pơkâ mâu tơdroăng ki kal tung kơpong, veăng tơleăng mơnhên mâu tơdroăng tơvâ tơvân ki môi kong pơlê tung kơpong ôh tá chiâng tơleăng mơnhên, hlối tơleăng mơnhên klêi mâu tơdroăng ki hâi châ pêi pro ki thế tơrŭm môi tuăn lơ luât râ kơpêng pơkâ dêi mâu khu xiâm, kơvâ cheăng ƀă kong pơlê tung kơpong.

Kơpong tơbăng Kroăng Hồng châ mơhno troăng pêi pro chiâng kơpong mơnhông rĕng, krá tơniăn, tung mê, pơlê kong xiâm Hà Nội “Lĕm kơnía git, rơkê plĕng- Tiô túa nếo”, chiâng tíu xiâm, tíu ki mơnhông tung kơpong ƀă tung lâp tơnêi têa, mơ-eăm tơdâng pơlê kong xiâm dêi mâu kong têa ki mơnhông tơƀrê tung kơpong.

A hneăng hôp rôh kố, Kăn xiâm hnê mơhno mâu khu xiâm, kơvâ cheăng, kong pơlê tơpui tơno ƀă mơjiâng Pơkâ kơpong tơbăng Kroăng Hồng pơla hơnăm 2021-2030, hvái ngăn tơdroăng vâ pêi troh hơnăm 2050 ƀă tuăn tơmiât ‘na troăng rơhlâ, vá pêi ton hơnăm, tơniăn tơrŭm, tơdâng tơ‘mô, môi tuăn, pêi tơƀrê ƀă krá ton.