Kơxop hlá mơ-éa kố ăm ‘nâi, sap ing hơnăm 2000 troh nôkố, Tơnêi têa hiăng pro 16 to tíu pêi cheăng ki kal dêi tơnêi têa, la tíu pêi cheăng xuân tá hâi chiâng hngêi trăng ki hriăn plĕng ‘na tơdroăng cheăng tung la ngiâ xua ối pro tơprâ tơprŭng, tá hâi tŭm túa ki xúa tơdâng tơ’mô ƀă tơrŭm krá ƀă mâu kơvâ cheăng kong ngê̆ ki kal. A rôh hôp, mâu khu xiâm, kơvâ cheăng pơkâ thế pêi pro nhên tíu ối ‘na luât, troăng hơlâ pơkuâ ngăn, liăn ngân, tơdroăng ki tơrŭm pơla mâu tíu pêi cheăng hriăn plĕng vâ ví ôh tá tơdâng tơ’mô, pro mơhrê liăn ngân tê kơtê.

Mơgêi rôh hôp, pôa Hồ Quốc Dũng, Phŏ Ngế pro xiâm hnê ngăn tơnêi têa pơkâ thế Khu xiâm ngăn Khoa hok ƀă Kŏng ngê̆ pơtối séa ngăn pơkâ pêi ki xiâm, hnoăng cheăng, troăng tơbleăng pêi; mơjiâng tíu pêi cheăng mơnúa ngăn rơkê plĕng, tơdâng, xúa tơdjuôm ki tơƀrê, gum tung tơdroăng mơnhông khoa hok kŏng ngê̆, pơhlêh nếo tơmiât pêi rơkê ƀă mâu kong ngê̆ tung la ngiâ.